Футбол бўйича Европа Чемпионатининг D гуруҳининг 1-турида Франция Австрияга қарши баҳс олиб борди.
Учрашувда французлар минимал ҳисобда (1:0) ғалаба қозонди. Иккинчи бўлимнинг охирги дақиқаларида Мбаппе ҳимоячи билан тўқнашиб кетди. Шифокорлар ёрдамидан сўнг футболчи майдонни тарк этди.
L’Equipe нашрининг ёзишича, Франция терма жамоаси сардорининг бурни синган. Ўйиндан сўнг у тез ёрдам машинасида Дюссельдорфдаги касалхонага олиб кетилган. Дастлабки текширувлардан сўнг футболчининг бурни жарроҳлик амалиётига муҳтож эканлиги хабар берилди.
Франция терма жамоаси ҳужумчиси Оливье Жиру ҳужумчи Килиан Мбаппенинг жароҳати ҳақида фикр билдирди.
“Умид қиламизки, у тезда тузалиб кетади. Биламан, ҳозир унга жуда оғир. Бу мен билан ҳам содир бўлган”.
Бир оздан сўнг Мбаппе жарроҳлик амалиётига муҳтож эмаслиги хабар берилди. Бу ҳақда Франция футбол федерацияси маълум қилди.
“Мбаппе ҳозир даволанмоқда, бироқ у яқин орада жарроҳлик амалиётини ўтказмайди. Даволаниш сўнгида футболчи майдонга қайтиши учун унга ҳимоя ниқоби тайёрланади”.
Килиан Мбаппе Х (собиқ Twitter) ижтимоий тармоғида “Ниқоб учун вариантлар борми?”, деб ёзиб қолдирди.
Россиялик футболчи Андрей Аршавин Матч TV каналидаги кўрсатувда Мбаппега “Нинзя тошбақалар” мультфильмидаги Донателло образининг ниқобини таклиф қилган.
Ўзбекистон футбол ассоциацияси Тиббий қўмита раиси, шифокор Аброр Пирриев франциялик футболчининг жароҳати ҳақида ўз фикрларини билдирди.
“Футболчининг бурни синганда жароҳатнинг оғир-енгиллик даражасига қараб реабилитация жараёни ўртача 1-3 ой вақтни олади. Оғир ҳолларда 6 ойгача чўзилиши мумкин. Чунки гап фақат бурун суягининг синиши ёки унинг битиши ҳақида эмас, балки ҳолат ортидан бош мияга етказилган жароҳат даражаси ва уни тўлиқ тузалиш даври ҳам инобатга олинишидадир.
Килианга тўхталсак, ҳозирги маълумотларга таяниб айтиш мумкинки, агарда Мбаппе операция столига ётадиган бўлса, у учун Европа чемпионати тугайди ва мухлислар суюклисини ўртача 2 ойдан кейин майдонда кўришлари мумкин бўлади. Аммо операция талаб қилинмаса ҳам Килиан учун Европа чемпионати сўроқ остида қолаверади. Мухлисларга таскин сифатида энг яхши тахминларга таянсак, футболчи финалга яқин ўйинлардагина (агарда жамоаси етиб борса) янги имижда – ҳимоя ниқобида майдонга тушиши мумкин бўлади”, — дейди “Локомотив” БФК бош шифокори.
Франция терма жамоаси Евро—2024 мусобақаси доирасидаги иккинчи учрашувни Нидерландияга қарши ўтказади. Учрашув 22 июнь куни бўлиб ўтади.
Изоҳ (0)