Афғонистонда қизларнинг ўрта мактабларга бориши тақиқланганига минг кундан ошди. БМТнинг Болалар жамғармаси (ЮНИСЕФ) “аҳолининг ярми қолоқ экан, ҳеч бир давлат олға интила олмаслиги”ни таъкидлади. Бу ҳақда Associated Press хабар берди.
ЮНИСЕФ ижрочи директори Кетрин Рассел ўз баёнотида “Толибон” ҳукуматини барча болаларга зудлик билан ўқишини давом эттиришига рухсат беришга, халқаро ҳамжамиятни эса афғон қизларини қўллаб-қувватлашга чақирди. Ташкилотнинг огоҳлантиришича, қизларнинг таълим олишини тақиқлаш Афғонистоннинг қонуний ҳукумат сифатида “Толибон”ни тан олиш учун энг катта тўсиқдир. 2021 йилда АҚШ ва НАТО қўшинларини олиб чиқиб кетиши ортидан Афғонистонни эгаллаб олган “Толибон” қизларнинг ўқишни давом эттиришини тақиқлади.
Нейтрал бошқарув ҳақидаги дастлабки ваъдага қарамай, “Толибон” аёлларга олий таълим олиш, боғлар каби жамоат жойларига ташриф буюришни ҳам тақиқлади. 1990 йилларда Афғонистонда “Толибон” ҳукмронлик қилган даврда ҳам қизларнинг ўқиши ман қилинганди. “Толибон” қизларнинг 6-синфдан кейин дарсларга боришини тақиқлаш орқали Афғонистонни мазкур чекловлар билан дунёдаги ягона давлатга айлантирди.
ЮНИСЕФ ижрочи директори қизларнинг тизимли равишда четлаштирилишини “нафақат уларнинг таълим олиш ҳуқуқини очиқдан очиқ бузиш, балки имкониятларнинг камайишига ва руҳий саломатликнинг ёмонлашишига олиб келишини айтди.
Кетрин Расселнинг сўзларига кўра, ЮНИСЕФ ҳамкорлар билан 600 000 нафар болаларга, уларнинг учдан икки қисми қизларга жамоатчилик асосида таълим машғулотларини ўтказиш ва ўқитувчилар малакасини ошириш учун ишламоқда.
Human Rights Watch ташкилоти афғон ўғил болалари таълим олиш имконига эга бўлсалар-да, “қўпол” таълим сиёсати уларга зарар етказаётганини айтди. Декабрдаги ҳисоботда малакали ўқитувчилар, жумладан, аёлларнинг ишдан кетгани, жисмоний жазоларнинг кучайиши натижасида ўғил болаларнинг таълими жиддий зарар кўргани таъкидланган.
Изоҳ (0)