Ўзбекистонда мажлисларда узрли сабабларсиз қатнашмаган депутатлар ваколати муддатидан илгари тугатилиши мумкин

Олий Мажлиси Қонунчилик палатасининг бир гуруҳ депутатлари халқ вакилларининг масъулиятини янада оширишга хизмат қиладиган қонун лойиҳасини ялпи мажлисда кўриб чиқиб, қабул қилди.

Депутатларнинг мақоми тўғрисидаги қонунга ўзгартириш ва қўшимчалар киритиш ҳақидаги қонун лойиҳасида депутатларнинг ҳақ тўланадиган тегишли турдаги фаолият билан шуғулланишига йўл қўйилмаслиги тўғрисида огоҳлантириш олганидан кейин ҳақ тўланадиган бошқа турдаги фаолият (илмий, ижодий ва педагогик фаолиятдан ташқари) билан шуғулланган тақдирда, уларнинг ваколатлари муддатидан илгари тугатилиши мумкинлиги назарда тутилмоқда.

Бундан ташқари, депутатнинг тегишли палата, сиёсий партия фракцияси, ўзи таркибига сайланган қўмита, комиссия фаолиятида бир календарь йил давомида ўттиз ёки ундан ортиқ иш куни узрли сабабларсиз иштирок этмаган тақдирда, шунингдек чет давлатнинг доимий яшаш гувоҳномасини ёки чет давлат ҳудудида доимий яшаш ҳуқуқини тасдиқловчи бошқа ҳужжатни олган тақдирда ҳам, уларнинг ваколатлари муддатидан илгари тугатилиши мумкин. Бу қоидалар Сенатда доимий асосда ишлайдиган сенаторларга ҳам тегишлидир.

Қонун лойиҳасида депутатнинг, сенаторнинг одоб-ахлоқ қоидалари бузилгани учун уларга нисбатан қўлланиши мумкин бўлган таъсир чоралари ҳам янада аниқлаштирилган.

Унга кўра:

• депутатнинг, сенаторнинг одоб-ахлоқ қоидаларини бузишга йўл қўйилмаслиги кўрсатиб ўтилган ҳолда депутатга, сенаторга огоҳлантириш бериш;
• депутатдан, сенатордан Қонунчилик палатаси, Сенат, шунингдек, ўзи таркибига сайланган қўмита, комиссия мажлисларида узр сўрашни талаб қилиш;
• депутатнинг, сенаторнинг одоб-ахлоқ қоидалари бузилишига депутат, сенатор томонидан йўл қўйилгани фактини палата мажлисида ўқиб эшиттириш;
• депутат, Сенатда доимий асосда ишловчи сенаторнинг иш ҳақидан ушлаб қолиш кўзда тутилмоқда.

Қонун лойиҳасида халқ вакилларининг тегишли палата, сиёсий партия фракцияси, шунингдек, ўзи таркибига сайланган қўмита, комиссия мажлисларида узрли сабабларсиз иштирок этмаган тақдирда, ҳар бир иштирок этилмаган ҳолат бўйича бир кунлик иш ҳақи унинг розилигисиз ушлаб қолиниши ҳам кўзда тутилмоқда.