Ипотека банк: ўтган беш ойда аёл тадбиркорларга 80 млрд сўмдан ортиқ кредитлар ажратилди

12 июнь куни Тошкент шаҳрида “Аёллар тадбиркорлигида рақамлаштириш ва ривожланиш истиқболлари” мавзусида семинар бўлиб ўтди.

Тадбир Ипотека банк АТИБ, Европа тикланиш ва тараққиёт банки (ЭТТБ) ҳамда “Тадбиркор аёл” уюшмаси ҳамкорлигида ташкил этилди.

Семинар очилишида Ипотека банк Кичик ва ўрта бизнес дирексияси директори Беҳзод Мирзаев ЕТТБ билан амалга оширилаётган “Марказий Осиёда бизнесдаги аёллар” дастури ҳақида гапирди.

“Ипотека банк ЕТТБ билан 2020 йилдан бери ҳамкорлик қилиб келади. Ҳозиргача Европа тикланиш ва тараққиёт банкидан икки маротаба 10 миллион доллардан кредит линиялари жалб қилганмиз. Шунинг ҳисобидан аёллар бизнес лойиҳаларини молиялаштириш, хусусан, рақамлаштиришга кредит маблағлари ажратилган. 2024 йил бошидан бери банкимиз ҳисобидан ҳамда жалб қилинган маблағлардан 254 нафар тадбиркор аёлга 80,2 миллиард сўм кредитлар ажратилди. Натижада 114 та янги иш ўрни яратилди”,—деди банк вакили.

Жорий йилда Ипотека банк ва ЕТТБ билан ҳамкорликдаги келишувга асосан, 3 миллион доллар миқдоридаги маблағлар тадбиркорликни рақамлаштиришга йўналтирилади.

Рақамли технологиялар вазири маслаҳатчиси Камола Собирова “Дарё” мухбири билан суҳбатда тадбирнинг аҳамияти ҳақида фикр билдирди.

“Жамиятимизда фаол мавзулардан бири бу аёллар. Бугунги семинар аёллар тадбиркорлиги ва бизнес кўникмаларини ривожлантириш мақсадида ташкил этилгани мени хурсанд қилди. Мулоқотда жуда долзарб мавзуларда суҳбатлашилди. Ўйлайманки, тадбиркор аёллар ўзлари учун кўплаб фойдали маълумотлар олди. Бундай тадбирлар иштирокчилар networkingини оширади, кейинчалик олган билимларини бизнесини ривожлантиришга тадбиқ этишга туртки беради”, — деди вазир маслаҳатчиси.

Ҳозирда Ипотека банк филиаллари 50 мингдан ортиқ кичик бизнес субъектларига хизмат кўрсатмоқда. Шундан 13 мингдан ортиғини тадбиркор аёллар ташкил этади. Банк аёллар учун нафақат кредит ажратиш, балки уларнинг тадбиркорликдаги билимларини ошириш учун ўқув семинарлари уюштириб келмоқда.

“Мисс Lighting” МЧЖ таъсисчиси, тадбиркор Умида Раҳмонова Ипотека банк ва ЕТТБ кўмагида бизнесини рақамлаштиришга эришганини айтди.

“Корхонамизда лед лампалари ва қандиллар ишлаб чиқарилади. 2021 йилда Ипотека банк ва ЕТТБ томонидан бизнесимизни рақамлаштириш учун 10 минг доллар грант ажратилди. Кейин Европадан экспертлар ёллаб, қисқа муддатда маркетплейс яратдик. Натижада компаниямиз рақамлашди ва бу биз учун жуда катта ютуқ бўлди. Яъни оддий корхонадан рақамлаштирилган корхона босқичига ўтдик. Бугунги кунда ўз маҳсулотларимизни жаҳон бозорига олиб чиқмоқдамиз. Бир нечта давлатларда филиалларимиз очилган”, — деди тадбиркор.

Семинарда Ипотека банк томонидан аёл тадбиркорлар учун тақдим этилаётган банк маҳсулотлари, бизнесни рақамлаштириш орқали жаҳон бозорларида ўз ўрнига эга бўлиш имкониятлари ҳамда “Анор” онлайн платформаси тўғрисида маълумот берилди.

Қайд этилишича, яқин кунларда Ипотека банк ва Халқаро молия корпорацияси ўртасида 20 миллион доллар миқдоридаги шартнома имзоланиши кутилмоқда.

Мазкур маблағларнинг 25 фоизи аёллар тадбиркорлигини молиялаштиришга йўналтирилади.

Реклама ҳуқуқи асосида.