АҚШ Украинанинг “Азов” бўлинмасига киритилган қурол-яроғ чекловларини бекор қилди

АҚШ ҳукумати Украинанинг “Азов” бўлинмасига киритилган қурол-яроғ чекловларини бекор қилди. Бу ҳақда Вашингтон манбаларига таяниб, BBC хабар берди.

Манбада айтилишича, Украинанинг “Азов” бригадасига қурол етказиб бериш ва қайта тайёрлашга қўйилган узоқ йиллик тақиқ олиб ташланган. Ушбу чекловлар батальонга ўта ўнг гуруҳлар билан алоқалари фош бўлиши ортидан жорий қилинган эди.

АҚШ Давлат департаменти баёнотига кўра, бригада томонидан инсон ҳуқуқлари қўпол равишда бузилгани ҳақида ҳеч қандай далил топилмаган. Бунгача кўплаб манбалар бўлинма аъзоларини кучли миллатчилик ғоялари таъсирида украин бўлмаган аҳолига зўравонлик қилишда айблаган эди.

“Азов” раҳбарияти Вашингтоннинг қароридан миннатдорлигини билдирган. Бригадага нисбатан асосий айбловчи бўлган Россиянинг ёлғон баёнотлари энди унинг ўзига қарши зарбага айланганини билдирган.

Расмий Москва бу қарорни қоралаган. Кремль матбуот котиби Дмитрий Песков АҚШни Россияга бостириш учун неонацистлар билан ҳамкорлик қилишда айблаган.

• Манбада айтилишича, гап Украина миллий гвардиясининг 12-“Азов” махсус кучлар бўлинмаси ҳақида кетмоқда.
• Ушбу бўлинма тўғридан тўғри Украина президентига бўйсунади. Россия ташвиш билдираётган “Азов батальони” гуруҳи эса бутунлай бошқа тузилма бўлиб, у 2014 йилда Россиянинг Украина ҳудудига бостириб киришига қарши тузилган.
• Россия ушбу икки ташкилот тушунчасини бирлаштириш орқали дезинформация стратегияси қўллашга уринаётгани хабар берилган.