Ҳабиб Нурмагомедов солиқ идораларидан 397 млн рубль қарздор экани маълум бўлди

Енгил вазн тоифасидаги Ultimate Fighting Championship (UFC)нинг собиқ мағлубиятсиз чемпиони Ҳабиб Нурмагомедов Федерал солиқ хизматидан 309,7 миллион рубль қарздор. Бу ҳақда Маш Telegram канали хабар берди.

Манбага кўра, май ойида қарз миқдори 306 миллион рубльни ташкил этган ва бир ой ичида 3,5 миллион рубльга ошган. Федерал солиқ хизмати Ҳабибнинг қариндошлари ҳисобларини ёпган ва текширувлар ўтказган.

“Бизга маълум бўлишича, солиқ идоралари Нурмагомедовнинг амакиваччаси Умарга тегишли иккита компаниядаги ҳисобларни блоклаб қўйган. Бу — қурилиш компанияси ва деҳқончилик фермаси. Икки компаниянинг қарзи — 271 рубль.

Ҳабибнинг амакиваччаси Абубакарнинг тугатилган икки якка тартибдаги тадбиркорлик фирмасининг умумий қарзи — 44 копейка”, — дейилади хабарда.

Қайд этилишича, Нурмагомедов бошчилигида шуғулланаётган амалдаги UFC чемпиони Ислом Махачевнинг солиқдан қарзи йўқ. Ҳабибнинг ўзи вазиятга изоҳ бермаяпти.

Ҳабиб Нурмагомедов ўзининг сўнгги жангини 2020 йилнинг кузида ўтказиб, америкалик Жастин Гетжини мағлуб этган эди. Жангдан сўнг дарҳол у профессионал фаолиятини якунлаганини эълон қилиб, онасига отасисиз жанг қилмасликка ваъда берганини тушунтирди. Фаолиятини якунлагандан сўнг, Нурмагомедов Eagle FC промоутерлик компаниясига асос солди.

Бундан ташқари,  у бир нечта компанияларга асос солган. Аввалига Ҳабиб мулкдорлардан бири сифатида қайд этилган, аммо кейин у ўз қариндошлари ва дўстларини қолдириб, таъсисчилар рўйхатидан чиқиб кетган.

Бу Федерал Солиқ хизмати учун ғалати туюлди ва улар терговни бошлади. Нурмагомедовнинг бир қанча компаниялари ёпилди. Масалан, “Ҳикмет Travel” МЧЖ расмий ҳужжатдаги ишончсиз маълумотлар бериш айби билан ёпилди. Eagle FC компаниясини ҳам худди шундай тақдир кутмоқда. Унинг хайрия фонди ҳисоби Ҳабибнинг шахсий ҳисоби каби блокланган.

Спортчи аралаш яккакураш (MMA) бўйича 29 та жанг ўтказиб, уларнинг ҳар бирида ғалаба қозонган. 2021 йилда “Ижтимоий фикр” жамғармаси сўрови натижасида Ҳабиб спортда йил одами деб топилди. 2023 йил 22-октябрда Нурмагомедов жангга алоқадор ҳамма нарсани ташлаб кетганини айтди.