Оқ уй Швейцарияда бўлиб ўтадиган Украина бўйича тинчлик саммитда АҚШ вице-президенти Камала Ҳаррис иштирок этишини расман эълон қилди.
Аввалроқ Жо Байден саммитга бормаслиги, чунки у Калифорниядаги сайлов кампанияси учун маблағ йиғиш маросимида бўлиши айтилган эди.
Оқ уйга кўра, 15 июнь куни АҚШ вице-президенти Тинчлик саммитида иштирок этиш учун Швейцарияга боради.
Вице-президент Байден маъмуриятининг Украина суверенитети ва ҳудудий яхлитлиги, БМТ низоми тамойиллари асосида адолатли ҳамда мустаҳкам тинчликни таъминлашга қаратилган саъй-ҳаракатларини қўллаб-қувватлашини таъкидлайди, – дейилади Оқ уй баёнотида.
Тинчлик саммитида миллий хавфсизлик бўйича маслаҳатчи Жейк Салливан ҳам бўлиши айтилган. Украина президенти Владимир Зеленский саммитда АҚШ президенти Жо Байденни шахсан ўзи кўришни хоҳлашини айтган эди.
Тинчлик саммити 15—16 июнь кунлари Швейцариянинг Люцерн шаҳри яқинидаги Бюргеншток курортида бўлиб ўтади. Унда дунёнинг камида 107 давлати иштирок этади. Зеленскийга кўра, Тинчлик саммити Украина учун БМТ низоми ва халқаро ҳуқуқ нормаларига мувофиқ кенг қамровли, адолатли ва мустаҳкам тинчликка эришиш учун мулоқот майдонига айланади.
Хитой, Саудия Арабистони, Бразилия, ЖАР ва Покистон мазкур саммитда иштирок этишдан бош тортган.
Изоҳ (0)