Россияда январдан майгача бўлган даврда ишлаш ёки яшаш учун рухсатнома олиш мақсадида рус тили, тарих ва Россиянинг асосий қонунчилиги бўйича имтиҳонлардан ўта олмаган хорижликлар улуши қарийб 10 баробар ошди. Бу ҳақда мамлакат Таълим ва фан вазирлигига таяниб, “ТАСС” хабар берди.
Вазирликнинг таъкидлашича, имтиҳон топшириш жараёнига бўлган юқори эътибор шундай натижага сабаб бўлмоқда.
“Россия бўйлаб имтиҳон топшириш имконияти сақланиб қолмоқда. Шу билан бирга, имтиҳон тартибига риоя қилиш даражаси ҳам ошди — январдан майгача имтиҳондан ўтмаганлар фоизи деярли 10 бараварга кўпайди”, — дейилади хабарда.
Ҳозирда Россияда мигрантлар имтиҳон топшириши учун 129 та майдон мавжуд. Улардан 41 таси Россия Ички ишлар вазирлиги негизида, 87 таси федерал ва минтақавий университетлар негизида, яна 1 таси минтақавий давлат ташкилоти негизида фаолият юритади.
Таълим ва фан вазирлиги 1 майдан бошлаб тижорат ташкилотларига хорижликлар учун имтиҳон ўтказиш ва уларга сертификатлар бериш тақиқланганини эслатмоқда.
Изоҳ (0)