Тошкент шаҳар судлари прокурорсиз ўтган судни изоҳлади

“Дарё”да “Суд прокурорсиз ўтди, судланувчи судьяга ‘отвод’ берди: Олмазор туман судида ноодатий ҳолат кузатилди”, сарлавҳали мақола эълон қилинган бўлиб, унда 29 май куни давом этган суднинг навбатдаги мажлисидаги ноодатий ҳолатлар тилга олинганди. Тошкент шаҳар судлари ахборот хизмати мазкур мақолага муносабат билдирди. 

Жиноят ишлари бўйича Олмазор туман судида Жиноят кодексининг 168-моддаси 4-қисми “а”, “в” бандлари ва бошқа моддалари билан айбланаётган Ж.Баҳодиров, А.Алимжонов ва Ҳ. Маҳамаджоновга оид жиноят иши мазмунан кўриб чиқилмоқда. Суд мажлиси 2024 йил 29 майда давом эттирилиб, иш юзасидан жабрланувчилар сони 400 нафарга яқинлиги сабабли рўйхат асосида 40 нафар жабрланувчи суд мажлисига чақиртирилган. Шу куни суд мажлисига оммавий ахборот воситалари вакиллари келиб, раислик қилувчидан суд жараёнини тасвирга олишни сўрашган. Суд ушбу ҳолат юзасидан тарафлар фикрини сўраб, икки нафар судланувчи норозилик билдиргани сабабли жараённи тасвирга олишни рад қилиш тўғрисида ажрим қилган. Бироқ оммавий ахборот воситалари мухбирларига суд мажлисида иштирок этишга рухсат берилган.

Бундан ташқари, судда судланувчи Ж.Баҳодиров раислик қилувчидан олдинги суд мажлисида киритган илтимосномалари юзасидан чиқарилган ажрим нусхасини беришни сўраган. Раислик қилувчи унга ушбу ажримлар Жиноят-процессуал кодексининг 423-моддасига асосан суд мажлиси баённомасида қайд этилганини, алоҳида ҳужжат тарзида расмийлаштирилмаслигини маълум қилиб, шу кунги суд мажлисида жабрланувчилар сўроқ қилинишини тушунтирган. 
Шундан сўнг судланувчи “жабрланувчиларга агар қамоқдан чиқса, зарарни қоплаши мумкинлигини тушунтираётганида раислик қилувчи унинг фикрини бўлгани”ни важ қилиб, раислик қилувчини рад қилиш тўғрисида оғзаки илтимоснома билан мурожаат қилган. 

Ушбу илтимоснома юзасидан тарафлар, шу жумладан, давлат айбловчисининг фикри тингланиб, Жиноят-процессуал кодексининг 76-моддасида назарда тутилган рад қилиш учун асослар йўқлиги боис ушбу раддияни рад қилиш тўғрисида алоҳида хонада ажрим чиқарилиб, суд мажлисида эълон қилинган. Шу куни судга келган барча жабрланувчилар сўроқ қилиниб, суд мажлиси бошқа кунга қолдирилган, — дейилади масъуллар изоҳида.

Қўшимча қилинишича, Жиноят-процессуал кодекси 497-1-моддасига кўра, биринчи инстанция судининг суд муҳокамаси вақтида чиқарилган ажримлари устидан шикоят билдириш, ҳукм устидан шундай ҳаракатлар содир этиш билан бир пайтнинг ўзида амалга оширилиши мумкинлиги маълум қилинади.