Telegram мессенжеридаги каналларда “Сирдарё”, “Яллама” ва “Нажимов” чегара-божхона постларининг Ўзбекистон билан чегарадош томонида тирбандликлар мавжудлиги, ичи тўла мева бўлган фуралар икки кундан бери чиқарилмаётгани ҳақида хабарлар тарқалганди. Шундан сўнг Божхона қўмитаси қишлоқ хўжалиги маҳсулотларини чегара-божхона постларида навбатсиз расмийлаштириш йўлга қўйилганини маълум қилди. Бу ҳолатга қизиқиш билдирган ОАВ вакиллари учун пресс-тур ташкил этиб, жараён ҳақида маълумот берди.
Божхона қўмитасининг бўлим бошлиғи Элёр Ҳакимовнинг маълумот беришича, чегара-божхона постларидаги тирбандликлар ҳақиқатан мавжуд бўлиб, айнан тармоқларда тарқалган видеолардан сўнг бунинг олдини олиш чоралари кўрилган.
Ҳар йили одатда шунақа ҳолатлар кузатилади. Шу боис божхона органлари томонидан бунинг олдини олиш чоралари кўрилади. Биз бугун журналистларга жорий мавсумда нима қилингани ҳақида маълумот бермоқчимиз, — дейди тармоқларда тарқалган ҳолатни тасдиқлаган масъул.
Билдирилишича, Ўзбекистондаги мавжуд энг катта чегара-божхона постларидан бири бўлмиш “Яллама”да импорт учун 6 та, экспорт учун 5 та йўлак ташкил этилган.
Одатий вақтларда “Яллама” чегара-божхона постидан кунига 400-500 та юк автомобили ҳаракатланган бўлса, пишиқчилик пайтида бу кўрсаткич 1000-1500 тага чиқади. Шу сабаб жорий мавсумда қишлоқ хўжалиги маҳсулотлари учун “яшил” йўлак ташкил этилди. Алоҳида тезкор штаб тузилиб, чегара-божхона постларига 100 нафар ходимдан иборат қўшимча куч сафарбар этилди, — дейди қўмита бўлими бошлиғи.
Таъкидланишича, айни кунда қишлоқ хўжалиги маҳсулотлари ортилган юк автомобиллари постларда ташкил этилган яшил йўлаклар орқали чегарадан тез ва осон, шунингдек қисқа фурсатларда чиқиб кетишга муваффақ бўлмоқда.
Постнинг ичкарисида автотранспортлар ҳаракатини тартибга келтириб, айнийдиган озиқ-овқат маҳсулотлари ортилган юк автомобилларини навбатсиз ўтказиб юбориш жудаям осон. Бу божхона ходимлари томонидан амалга оширилади. Бироқ постгача бўлган ҳудудда ҳайдовчиларнинг барчаси ҳам буни тўғри тушунмайди. Дейлик, бошқа юк ортилган юк автомобили ҳайдовчиси ўзидан кейин келган, айнийдиган озиқ-овқат маҳсулотлари ортилган юк автомобилини ўтказишга қаршилик қилиши мумкин. Шундай пайтларда божхона органлари томонидан ташкил этилган янги тизим иш бермоқда. Яъни айнийдиган маҳсулотлар ортилган юк автомобилларига алоҳида белгилар ўрнатилиб, улар навбатсиз ўтиши мумкинлиги ҳақида эълонлар берилмоқда. Қолаверса, ЙПХ ходимлари ва божхона инспекторлари томонидан ҳайдовчиларга тўғри тушунтиришлар берилиб, шундай маҳсулотлар ортилган юк автомобилларини кузатув асосида навбатларсиз ўтказиб юборишмоқда, — дейди масъул.
Қўмита вакилининг журналистларга маълумот беришича, жорий мавсумда экспортга чиқарилаётган озиқ-овқат маҳсулотлари ўтган йилнинг мос даврига нисбатан солиштирилганида 20 фоизга ортган.
Айни кунда об-ҳавонинг қулай келиши ҳам тадбиркорларга қўл келмоқда. Улар шу пайтдан фойдаланиб, асосан пиёз, гилос каби тез айнийдиган маҳсулотларини хорижлик харидорларга етказиб беришга ҳаракат қилмоқда, — дейди у.
Божхона қўмитаси ахборот хизмати раҳбари Ҳусан Тангриевнинг ОАВ вакилларига билдиришича, президент Шавкат Мирзиёев масъулларга 2024 йилда қишлоқ хўжалиги маҳсулотлари экспортидан тушаётган даромадни 3,5 миллиард долларга етказиш бўйича топшириқ берган.
2023 йилда бу рақам 2 миллиард доллар бўлганини инобатга олсак, демак бу йил олдимизга жуда катта марра қўйилган. Табиийки, бунга эришиш осон эмас. 2017 йилдан кейинги тенденцияни кузатадиган бўлсак, йилдан йилга фақатгина 2020 йилдаги пандемия даврини ҳисобга олмаганда ташқи савдо юклари ортилган транспорт воситалари сони сезиларли даражада ошиб бораётганини кўриш мумкин. Бу рақамлар қишлоқ хўжалиги маҳсулотлари экспорти даврига келганда янада ошади. Бу жараён божхонада тезкор чора-тадбирлар кўришни тақозо этади, — дейди Божхона қўмитаси ахборот хизмати раҳбари Ҳусан Тангриев.
ОАВ вакиллари билан суҳбатда бўлган юк автомобиллари ҳайдовчилари Даврон Эшмуродов ҳамда Салим Бурхонов айни кундаги имкониятлар уларнинг ишини енгиллаштириб, оғирини енгил қилаётганини айтмоқда.
Бугун 15-20 дақиқада постга етиб келиб, ишларимни битказиб, чиқиб кетишга тайёр бўлиб турибман. Постгача бўлган ҳудудда ҳайдовчилар ҳам вазиятни тўғри тушуниб, бизга йўл беришмоқда. Пиёз ортилган машинам билан қийналмасдан, ишларимни тез битиряпман. Божхона ходимлари ҳам хушмуомала бўлиб, ишимизни тез битиришмоқда, — дейди ҳайдовчилар.
Аниқлаштирилишича, “Яллама” постидан юк чиқараётган ҳайдовчи Салим Бурхонов 23 тонна пиёз ортилган юк машинасида юк ортилган манзилдан чиқиб, чегарадан чиқиб кетгунча 5 соат вақт сарфлаган.
Илгари худди шундай юкни ортиб, манзилга ташлаб келгунча 20-22 кун вақтимиз кетар эди. Божхона постларида 4-5 кунлаб қолиб кетардик. Бугун юкни ортиб, чегара-божхона постидан чиққунча 5 соат вақт етарли бўлди. Биз бундан хурсандмиз, — дейди юк автомобили ҳайдовчиси Салим Бурхонов.
Қўшимча қилинишича, айни кунда “Сирдарё” ва “Нажимов” чегара-божхона постларида, шунингдек ўзбекистонлик масъуллар таклифига биноан Қозоғистондаги айнан шу чегара-постлари билан ёнма-ён жойлашган постларда ҳам қурилиш таъмирлаш ишлари олиб борилмоқда. Тез орада мазкур ҳудудларда ҳам етарли даражадаги шарт-шароитлар яратилади.
Изоҳ (0)