Сирдарёда тадбиркорнинг тракторини 240 млн сўмга сотиб юборган ишчига жиноят иши қўзғатилди

Сирдарё туманида тадбиркорнинг мулкини ўзлаштирган шахс аниқланди, деб хабар беради Бош прокуратура ҳузуридаги департамент.

Қайд этилишича, департаментнинг Сирдарё туман бўлими томонидан тадбиркорлик субъектларининг ҳуқуқларини ҳимоя қилиш юзасидан терговга қадар текширув ўтказилган. Текширувда фуқаро Ш.К. “И.Р.М.” МЧЖнинг ўзига ишониб топширилган “БЕЛАРУСЬ 80Х” русумли тракторини бошқа бир фуқаро Х.Н.нинг номидаги “БЕЛАРУСЬ 80Х” русумли тракторининг завод ишлаб чиқариш рақамлари ёзилган биркани кўчириб ўтказиш орқали фуқаро М.А.га 240 миллион сўмга сотиб юбориб, ўзганинг мулкини ўзлаштириш йўли билан талон-торож қилгани аниқланган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.

Аввалроқ Қашқадарёда томчилатиб суғориш ускуналарини ўзлаштирган фермер хўжаликлари аниқлангани, Наманганда 545 млн сўм кредитни талон-торож қилган корхона раҳбарлари ушлангани, Нукусдаги кўзи ожизлар кутубхонасида 670 млн сўм талон-торож қилингани тўғрисида хабар берилганди.