Гилос жуда ҳам ширин ва фойдали мева эканлиги ҳеч кимга сир эмас. Кўпинча уни янги узиб олингани истеъмол қилинади, чунки ундан тайёрланган мураббо ва бошқа кўринишдаги пишириқларда гилос ўзининг мазаси ва фойдали хусусиятларини йўқотади.
Гилос ҳажми кичик бўлгани учун уни резавор деб аташади, аслида эса гилос мева ҳисобланади. Резаворларда эса қоидага кўра бир эмас, бир нечта уруғ бўлиши лозим.
Гилоснинг фойдали томонлари
Гилос антиоксидантлар манбайи бўлиб, таркибида полифеноллар, мелатонин, каротеноидлар, E ва C витаминлари мавжуд бўлиб, улар танани ҳужайраларга зарар етказадиган эркин радикаллардан ва бир қанча касалликлардан ҳимоя қилади. Тадқиқотлар шуни кўрсатадики, гилос сурункали яллиғланиш асоратларини сезиларли даражада камайтиради. Гилос таркибидаги полифеноллар артрит, қанд касаллиги, саратон ва гипертония каби касалликларнинг олдини олиши мумкин.
Маълумотларга кўра, гилос II турдаги қандли диабетга чалинганлар учун идеал углевод манбайи ҳисобланади. Унинг гликемик индекси паст бўлгани сабабли гилос қондаги шакар миқдорининг кўтарилишига олиб келмайди. Шунингдек, гилос руҳий саломатлик учун ҳам фойдали мева бўлиб, кортизол миқдорини пасайтиради ва кайфиятни кўтаради.
Бундан ташқари, америкалик олимлар гилос истеъмоли билан саратон ривожланишининг пасайиши ўртасида боғлиқликни аниқлади. Хусусан, гилос меваси ошқозон ости бези, кўкрак, жигар, йўғон ичак, тери ва ўпка саратонига чалиниш эҳтимолини камайтиради. Бунга гилос таркибидаги периллил спирти ва фенол бирикмалар сабабчидир.
Гилос парҳез қилаётганлар учун идеал тамадди бўла олади. 100 грамм гилосда атиги 70 килокалория мавжуд. Ушбу мевада кўп учрайдиган пектин моддаси ошқозон-ичак тизимининг соғлом ишлаши учун муҳим элементдир. У табиий энтеросорбент, шунингдек, ичак микроорганизмлари учун зарур бўлган пребиётиклар манбайидир.
Гилосни қисқа вақтда музлатиш ёки унга шакар қўшиб мураббо тайёрлаш меванинг барча фойдали жиҳатларини йўққа чиқаради.
Гилоснинг зарарли томонлари
Гилосни тановул қилиш қуйидаги ҳолатларда тавсия этилмайди:
- аллергия;
- ичак касалликлари;
- ошқозон ва ошқозон ости бези касалликлари;
- индивидуал тўғри келмайдиган ҳолатларда.
Бир кунда қанча миқдорда гилос истеъмол қилиш мумкин?
ЖССТ ва профессионал тиббиёт бирлашмалари мутахассислари ҳар куни турли сабзавот ва меваларни истеъмол қилишни маслаҳат беради. Шу туфайли гилосни ҳам истисно ҳолатлардан ташқари ҳар куни тахминан 200 грамм миқдорда ейиш мумкин. Тавсия этилган кунлик меъёрга амал қилинмаса, ортиқча гилос метеоризм ва диареяни келтириб чиқариши мумкин.
Изоҳ (0)