Афғонистонда йўловчи автобуси деворга урилиши оқибатида 5 нафар фуқаро ҳалок бўлди. Бу ҳақда Etilaatroz нашри хабар берди.
Ҳалокат мамлакатнинг Бағлон вилояти ҳудудида юз берган. Ўртача тезликда кетаётган автобус йўл бўйида жойлашган фуқаро хонадони деворига бориб урилган.
Расмийлар ҳодиса оқибатида 5 нафар фуқаро ҳалок бўлганини билдирган. Жароҳатланган 13 нафар фуқаро яқин ҳудуддаги касалхонага олиб кетилган.
Бағлондаги манбалар ҳодиса 20 май куни маҳаллий вақт билан 02:00 да юз берганини хабар қилган. Ҳолат бевосита содир бўлган Пули-Хумри шаҳри яқинидаги “Транспорт порти” ҳудудига ёрдам гуруҳлари жўнатилган.
Полиция автоҳалокат сабаблари аниқланаётганини билдирган. Касалхонага жойлаштирилган фуқаролар саломатлиги ижобий ҳолатда экани маълум қилинган.
Изоҳ (0)