Непотизм ёки истеъдод: Голливуддаги машҳур оилаларининг меросхўрлари кинодаги карьерасини қандай бошлаган?

Голливуднинг машҳур оилалари ҳам бошқалардан фарқ қилмайди. Агар оилада ота ёки она машҳур бўлса, катта эҳтимол билан уларнинг фарзанди ҳам фильмларда иштирок этади. Бироқ бу болалар муваффақиятга қандай эришади? Баъзилар ўзларини исботлаш учун фамилиясини ўзгартиради, ота-онасининг шон-шуҳратига суянмайди. Бошқалари эса таниш-билиш ва фамилиядан фаол фойдаланади.

Спилберглар оиласи

Голливуднинг энг машҳур режиссёрларидан бири қизига карьерасидаги илк қадамларини қўйишига ёрдам бермоқда. Дестри Спилберг (Стивен Спилберг ва унинг иккинчи рафиқаси, актриса Кейт Кепшоунинг қизи) “Бунинг ҳақиқатлигини биламан” (2020) ва “Қизилмияли пицца” (2021) фильмларида иккинчи даражали ролларни ижро этиш билан бошлаган. Бир мунча вақт у отасининг фильмларида продюсер ёрдамчиси ва реквизит бўйича техник бўлиб ишлайди. Кейинчалик эса режиссёр бўлишга қарор қилади. Дестри ўзининг биринчи қисқа метражли “Рози” фильмини 2019 йилда суратга олган.

Кейинги қисқа метражли “Ўзимга қўйиб беринг” (2022) фильми кўплаб танқидлар ва таниш-билишчиликка йўл қўйилган ҳолатлар бўйича айбловларга сабаб бўлади: чунки сценарийни Оуэн Кинг (Стивен Кингнинг ўғли) ёзган, бош ролни эса Ҳoппeр Пенн (Шон Пеннинг ўғли) ўйнаган. Натижада Дестри ўзини оқламоқчи бўлади, бироқ кейинроқ твитларини ўчириб ташлайди ва ижод қилишда давом эттиради. Унинг Мишель Докери ва Жанкарло Эспосито иштирокидаги дебют бадиий фильми “Илтимос, болаларни овқатлантирманг” ҳозирда премьера ва прокатга тайёрланмоқда.

Депплар оиласи

Лили-Роуз Депп ота-онасидан (актёр Жонни Депп ва актриса Ванесса Парадис) табиий жозиба ва истеъдодни мерос қилиб олган. Бу фазилатлар қизга моделлик бизнесида карьера қуришга ва Chanel мода уйининг юзи бўлишга ёрдам беради. Аммо ота-онасидан ўтган ген ўз кучини кўрсатди. Лили-Роуз кинодаги дебютини Кевин Смитнинг “Қозиқ тиш” (2014) фильмидаги кичик роль билан қилган. 2016 йилдан 2018 йилгача у учта француз фильмида кичик ролларни ижро этган. Кейинги роллари ҳақиқий машҳурлик олиб келади, шундан сўнг продюсерлар янги актрисага жиддий эътибор қаратади.

2023 йил май ойида Канн кинофестивалида “Кумир” сериалининг премьераси бўлиб ўтди, унда Лили-Роуз рэпер Тhе Weeknd билан бирга бош ролни ўйнади. Гарчи шоу биринчи мавсумдан кейин бекор қилинган бўлса-да, Тime журнали актрисанинг истеъдодини қайд этади. Муваффақиятсиз лойиҳа Лили-Роузнинг қатъиятига таъсир қилмади, актриса ҳозирда ҳам ижод қилишда давом этмоқда.

Жонсонлар оиласи

Биринчи марта Дакота Жонсон (актёр Дон Жонсон ва актриса Мелани Гриффитнинг қизи, актриса Типпи Ҳедреннинг набираси) “Қоидаларсиз аёл” (1999) комедиясида суратга тушади. У ўгай синглиси Стелла билан биргаликда бош қаҳрамон Мелани Гриффитнинг қизлари ролини ўйнаган, режиссёр эса Дакотанинг ўгай отаси Антонио Бандерас эди. Маngо ва Wish брендларида қисқа вақт моделлик қилгандан сўнг Дакота кино оламига қайтиб келади ва классик ситкомларда кичик ролларда иштирок этади.

Актриса роль ўйнаган Э.Л.Жеймс романининг фильмга мослашувига кўпчилик танқидчилар салбий муносабат билдирган бўлса-да, баъзи журналистлар Жонсоннинг ижросини юқори баҳолайди. Шундан сўнг Жонсоннинг юлдузлик даври бошланади ва юқори даражадаги юлдузлар: Жонни Депп, Тилда Суинтон, Ральф Файнс, Брюс Дерн ва бошқалар билан биргаликда роль ўйнайди.

Расселлар оиласи

Актёрлар Курт Расселл ва Голди Ҳоун Голливудга нафақат Кейт Ҳадсон (Ҳоун ва мусиқачи ва актёр Билл Ҳадсоннинг қизи), балки шоу-бизнес осмонида эндигина чарақлаётган Уайт Расселлни ҳам ҳадя қилган. Уайт хоккей билан шуғулланиб, дарвозабон сифатида кўплаб ҳаваскор ва профессионал жамоаларда ўйнайди, аммо 2010 йилда жиддий жароҳатлар туфайли фаолиятини тугатишга мажбур бўлади. Шундан кейин Уайт Рассел ўзини фильмларда синаб кўришга қарор қилади.

Ҳар хил жанговар фильмлардаги кичик роллар ва “Қора ойна” эпизодларидан бирида иштирок этганидан сўнг, ёш актёрга ниҳоят жиддий лойиҳа ишониб топширилади. Уайтт Юлий Авери томонидан америкалик денгиз пиёдалари ва нацистлар ўртасидаги қарама-қаршилик ҳақидаги “Оверлорд” (2018) тарихий фильмида бош ролни ижро этади. Фильм томошабинлар ва танқидчиларнинг ҳайратига сазовор бўлади. Шундан сўнг Расселл “Лочин ва қишки аскар” (2021) фильмида суратга тушади ва Жон Уокер ролини ўйнайди. Яқинда Apple TV+ ва Legendary Теlevision ҳамкорликда суратга олган “Монарх: махлуқлар авлоди” (2023) сериалида Уайтт отаси Курт Расселл билан биргаликда роль ўйнайди — фильмда у отасининг ёшлигини гавдалантиради.

Андерсонлар оиласи

Эвер Габо Андерсон — машҳур актриса Мила Йовович ва режиссёр Пол Андерсоннинг қизи. Эвер онасининг изидан борган ва тўққиз ёшида Vogue Bambini журналининг муқоваси учун суратга тушган. Кейинчалик у Карл Лагерфельд, Микаэль Янссон ва Питер Линдберг билан ҳамкорлик қилади, аммо у ўзининг моделлик карьерасидан қониқмайди. Ота-онаси Эверни актёрликдан қайтаришга ҳаракат қилади, лекин у ўз сўзида қатъий туриб олади.

2016 йилда Пол Андерсон суратга олган саганинг олтинчи фильми чиқади, фильмда Эвер Алисия Маркуснинг болалигини ўйнаган. Онаси Мила Йовович эса улғайган Маркус ролини ижро этади. Marvel продюсерлари бу ёндашувни қадрлайди ва Эверни “Қора бева” фильмидаги (2021) ёш Наташа Романофф ролини ўйнашга таклиф қилишади. Ҳозирча Девид Лоурининг “Питер Пен ва Венди” (2023) эртаги янги версияси Эвер иштирок этган сўнгги лойиҳа ҳисобланади.