Самарқанд вилояти Республикада аҳоли сони бўйича энг олди қаторда туради. Кўҳна шаҳарда футболга қизиқиш ҳам бошқа жойлардан кам эмас.
Ўзининг бой тарихи ва содиқ мухлислари билан танилган “Динамо” клуби узоқ вақтдан бери шаҳар учун ғурур рамзи бўлиб келган. Афсуски, ҳозирги пайтда клуб катта муаммоларга дуч келмоқда.
“Пахтакор” стадионида бўлиб ўтган Суперлиганинг 7-турида “Сурхон”га қарши майдонга тушган футболчилар дурангга имзо чекди.
Ўйиндан сўнг бош мураббий Вадим Абрамов “Дарё.уз”га эксклюзив интервью бериб, “Динамо”даги оғир вазиятга ойдинлик киритди.
Мураббийнинг таъкидлашича, охирги 3,5 ой давомида “Динамо” футболчилари ва мураббийлари ўз маошларини ололгани йўқ. Мураббийга тўлов муддати ҳақида сўралганда, вазият бўйича аниқ жавоб берилмаганини айтди.
Диёр Имомхўжаев клуб хусусийлаштиргани ҳақида таъкидлаган эди. “Динамо” клуби бош ҳомий Agromir buildings томонидан молиялаштирилиши керак. Ўринли савол туғилади — ойликларни ким тўлаши керак: Самарқанд вилояти ҳокимлигими ёки Agromir buildings ташкилотими?
Бош мураббий ҳам ойлик маошлари ким томонидан берилиши кераклиги ҳақидаги саволга жавобни очиқ қолдирди.
Бундан ташқари, клуб “Динамо” стадиони таъмирланаётгани сабаб қўшни Жиззах вилоятида уй ўйинларини ўтказмоқда. Футболчилар ва мураббийлар ҳам ўша ерда яшаб, машғулотларда қатнашмоқда. Меҳмонхона харажатлари ҳамда шароитлар ҳақида сўралган саволга Вадим Абрамов ҳозирча ҳаммаси жойида эканлиги, лекин кейин нима бўлишини билмаслигини айтиб ўтди.
Тасаввур қилинг, сал кам 4 ойдан бери ойликларни тўламаётган ҳокимият ёки Agromir buildings компанияси меҳмонхона харажатларини тўлашни ҳам тўхтатса, кейин қандай ҳолат юз беради!?
ЎзПФЛ Самарқанддаги майдонларнинг ҳеч бирини мусобақаларни ўтказишга лойиқ кўрмагани боис, Самарқанд клуби “Сўғдиёна” майдонини ўйинлар учун танлаган. “Трибуна” нашри берган маълумотларга таянсак, майдоннинг дренаж тизими янгиланган, чим тайёр ҳолатда, аммо қурувчилар билан тўлов борасидаги муаммолар сабаб қолган ишларни бажарилиши тўхтаб қолган. Майдон таъмирига ким жавобгарлиги ҳақидаги савол ҳам жавобсиз қолмоқда.
Ушбу муаммоли вазиятда Профессионал футбол лигасининг ўрни ҳақида саволлар туғилади: Улар “Динамо”нинг аҳволидан хабардорми, агар билса, вазиятни юмшатиш учун қандай чоралар кўрилмоқда? Қолаверса, “Динамо” хусусий клуб бўлса, ПФЛ ўз мажбуриятларини бажариш учун хусусий ташкилотга босим ўтказиш ҳуқуқига эгами?
Ҳозир “Динамо” клуби футболчилари Суперлигадаги ўрни, ўйиндаги барқарорлик ва ғалабалар ҳақида ўйлаши керак. Бунинг ўрнига эса жамоа тўланмаган ойликлар, ўз уй майдонига қайтиш ва мавҳум келажак ҳақида фикр юритиши талаб этилади.
Жамоанинг ҳозирда жон-жаҳди билан ўйнаётганига сабаб мураббийнинг қўллови ҳамда ҳеч қачон ўз футболчиларини ёлғиз қўймаётган мухлислар ҳисобланади.
Жамоани қўллаб-қувватловчилар ўзларининг севимли жамоаси тезроқ муаммолардан ҳоли бўлиб, ўз шаҳрида ўйнашини хоҳлайди. Мусобақаларни ташкил этиш ваколатини олган ПФЛ унда иштирок этувчи жамоаларнинг ҳуқуқларини ҳам ҳимоячиси ҳисобланади. Тез орада ташкилотдан ҳаракат кутиб қоламиз.
Эркин Ғайбуллаев
Изоҳ (0)