Турк сериаллари дунё бўйлаб ўз мухлисларига эга. Кўплаб томошабинлар “Муҳташам юз йил”, “Севги изтироби”, “Қора ният” каби сериалларни севиб томоша қилган, бироқ турк кино оламида қизиқарли сюжети билан мухлислар қалбидан жой олган комедия йўналишидаги қизиқарли лойиҳалар ҳам мавжуд. Қуйида энг яхши турк комедик сериалларини тавсия қиламиз.
“Ҳар ердасиз” / “Her Yerde Sen” — 25 қисм (2019)
Сериалда тасвирланган Истанбулнинг гўзал кўчалари, ранг-баранг манзаралари, денгиз қуёши ва кулгили вазиятлар кўнглингизни кўтаради. Сюжетга кўра, гўзал Селин ва Демир қонуний равишда бир уйни харид қилган бўлиб чиқади. Бунга икки кекса опа-сингиллар сабабчи бўлади. Улар умумий мулки бўлган уйини бир-бирига билдирмай, икки харидорга сотиб юборади. Уларни судга бермаслиги учун икки ёшни бирлаштиришга ҳаракат қилади.
Сериалда бош ролларни актёрлар Фуркан Андич ва Айбуке Пусат ижро этган.
“Кўр-кўрона севги” / “Afili Ask” — 38 қисм (2019-2020)
Сериал премьераси 2019 йилда, сўнгги қисми эса 2020 йилнинг март ойида чиқарилган. Ҳар бири тахминан 120 дақиқа давом этган жами 38 қисмдан иборат. Асосий ролларни Чаглар Эртугрул (Керем) ва Буржу Озберг (Айше) ижро этган.
Бош қаҳрамонлар тасодифан нохуш вазиятга тушиб қолади, натижада улар шартли равишда турмуш қуриши керак бўлади. Ўз манфаати ва мақсади учун ўтказилган тўй маросимидан сўнг ёшлар жуда кўп муаммоларга дуч келади.
“Икки ёлғончи” / “Iki yalanchi” — 9 қисм (2017)
Ушбу сериалда ёшлар кўп ёлғон аралаштириб, ўзларини бой қилиб кўрсатишга уринишининг гувоҳи бўлиш мумкин. Ҳаётдаги омадсизликлардан кейин нотаниш қиз ва йигит пул ҳамма нарсани ҳал қилади, деган хаёлга келиб, бадавлатдек кўринишга ҳаракат қилади. Ўзига тўқ оила вакиллари билан танишади ва вақтини чоғ ўтказиб, бир-бирини севиб қолганини билмай қолади.
Бош ролларни Керемжем (Серкан) ва Яғмур Танрисевсин (Дуйгу) ижро этган.
“Севади, севмайди” / “Seviyor, Sevmiyor” — 28 қисм (2016)
Сериалда болаликдан бошланган севги ҳикояси ҳақида сўз боради. Бош қаҳрамон Денис исмли меҳрибон, матонатли қиз ҳаётида доим муваффақиятсизликка учрайди. У нима қилса ҳам, ҳеч бир иши ўхшамайди.
Бир куни у официант бўлиб ишлаган кафени жанжал билан тарк этади ва яхшироқ ишга киришни хоҳлайди. Денис 30 ёшда бўлса-да, лекин ҳаётда бирор муҳим нарсага эришмаган, турмуш ҳам қурмаганди. У мода журналига интервьюга боради. У ерда болалигида бирга ўқиган ва кўнгил қўйган синфдоши — Йигитни кўриб қолади. Семиз, бир оз тортинчоқ Йигитдан асар ҳам қолмаган эди, эндиликда у келишган, ўз соҳасининг яхши мутахассиси сифатида ишлайдиган шахс бўлиб етишганди.
Изоҳ (0)