Экология, атроф-муҳитни муҳофаза қилиш ва иқлим ўзгариши вазирлиги шаҳар чеккаларида, очиқ ҳудудларда дам олиш ҳолатлари кўпайиб бораётгани сабаб фуқароларга мурожаат билан чиқди.
Қайд этилишича, кунлар исиб, очиқ ҳудудларга дам олиш учун бораётган фуқаролар кўпайгани айрим кўнгилсиз ҳолатларга сабаб бўлмоқда, яъни дам олиш масканларида чиқиндиларни ташлаб кетиш, “Қизил китоб”га киритилган ўсимликларни узиш, олов ёқиш, атроф-муҳитни ифлослантириш ҳолатлари кўпаймоқда.
Шу муносабат билан вазирлик дам олишга чиққан фуқароларни қуйидагиларга амал қилишга чақиради:
- ҳосил бўлган маиший чиқиндиларни олиб чиқиб кетиш;
- кул ва ёнувчи моддаларни ўчириш;
- яшил зоналарда ўсимликларни пайҳон қилмаслик;
- “Қизил китоб”га киритилган ўсимликлар, жумладан, лолаларни ноқонуний термаслик;
- ёввойи ҳайвонларга дуч келганда ортиқча ҳаракат қилмаслик, уларга озор бермаслик.
Юқоридаги каби ҳолатлар кузатилса, Маъмурий жавобгарлик тўғрисидаги кодекснинг тегишли моддаларига асосан жазо чоралари қўлланилади.
Дам олиш масканларида турли экологик ҳуқуқбузарлик ҳолатларига дуч келинганида, бу ҳақда Экология вазирлиги (71 207-11-07), Ички ишлар органлари ёки Миллий гвардияга мурожаат қилиш мумкин.
Экология вазирлиги ҳузуридаги Экологик экспертиза маркази директори ўринбосари Адҳам Қурбоновга кўра, Ўзбекистон аҳолиси 2023 йилда 40 мингга яқин экологик ҳуқуқбузарлик содир этган бўлиб, бунинг учун 32 миллиард 700 миллион сўмлик жарима тайинланган.
Изоҳ (0)