Марказий Африка Республикаси президенти Фаустин-Арчанж Туадера мамлакат ҳудудида Россия ҳарбий базаси жойлаштирилиши мумкинлигини маълум қилди. Бу ҳақда “ТАСС” нашри хабар берди.
МАР президентининг сўзларига кўра, бу қадам мамлакатнинг мудофаа салоҳиятини мустаҳкамлашга ёрдам беради. Миллий қуролли кучлар салоҳиятини оширишга хизмат қилади.
Ҳозирда Марказий Африка Республикаси ҳукумати мамлакатнинг шарқий ҳудудларини Россия ҳарбий базасини жойлаштириш учун манзил сифатида кўриб чиқмоқда. Бу ушбу ҳудудларда мамлакат чегаралари хавфсизлигини таъминлашга ёрдам беришига ишонилмоқда.
“Мен шарқий минтақадан бу мақсадда фойдаланиш мумкин, деб ҳисоблайман, чунки у жуда катта. У марказдан жуда узоқ ва у ерда жуда кўп салбий кучлар мавжуд. Бу тадбиримиз чегараларни ҳимоя қилишга, кучларимизни ҳимоя қилишга ва ўша ҳудудларда хавфсизликни таъминлашга ёрдам беради. Ўйлайманки, Россия Федерацияси билан ҳамкорликни ривожлантириш жараёнида биз бу вазиятни таҳлил қиламиз”, — деган президент ўз мамлакатида жойлаштирилаётган Россия ҳарбий базаси истиқболларини шарҳлар экан.
Туадера Марказий Африка Республикаси кенг кўламли хавфсизлик муаммоларига дуч келаётганига эътибор қаратган. Шунинг учун мунтазам равишда хорижий ҳарбий базаларни жойлаштиришни режалаштирмоқда.
“Бизнинг ҳудудимизда кўп йиллар давомида француз базалари бор эди. Франция уларни ўз ихтиёри билан бўшатиб берди. Кейин Обода АҚШ базаси жойлаштирилганди. Америкаликлар ундан бир томонлама чиқиб кетишни маъқул кўрди”, — деган МАР президенти.
Изоҳ (0)