Германиянинг учта клуби 29 йил ичида илк бор еврокубоклар ярим финалига чиқди

Германиянинг учта клуби 29 йил ичида илк бор еврокубоклар ярим финалига чиқди.

“Бавария” ва “Боруссия” (Дортмунд) Чемпионлар Лигасининг ярим финалида ўйнайди, “Байер” эса Европа Лигасининг ҳал қилувчи финал ўйинида иштирок этиш учун курашади. Охирги марта бундай натижа 1994—1995 йилги мавсумда қайд этилганди. Эътиборли жиҳати, ўша пайтда ҳам айнан шу клублар бундай натижани қайд этган.

Чорак финалда “Бавария” Лондоннинг “Арсенал” жамоасидан кучлироқ бўлиб чиқди (умумий ҳисобда — 3:2) ва жамоа ярим финалда “Реал”га қарши ўйнайди. Биринчи ўйин 30 апрель куни, жавоб ўйини 8 май куни бўлиб ўтади.

“Боруссия” чорак финалда “Атлетико”ни икки ўйин натижасига кўра 5:4 ҳисобида мағлуб этди ва ярим финалга йўл олди. Улар кейинги босқичда “ПСЖ” билан ўйнайди. Биринчи ўйин 1 май куни, жавоб ўйини 7 май куни бўлиб ўтади.

“Байер” Европа Лигасининг чорак финалида “Вест Ҳэм”га имконият қолдирмади ва клуб ярим финалда “Рома” билан ўйнайди. Биринчи ўйин 2 майда, иккинчи ўйин 9 майда бўлиб ўтиши режалаштирилган.