Тошкент шаҳридаги Абдулла Қодирий ва “Дўстлик” боғлари қайта таъмирланиб, аҳоли фойдаланиши учун замонавий кўринишга келтирилади. Бу ҳақда шаҳар ҳокимлигининг қарори ҳам мавжуд. Ҳар икки боғ реконструкциясига камида 20 миллион доллар киритаётган инвесторларнинг ОАВ вакиллари билан учрашувида билдирилишича, айни пайтда ташландиқ ҳолатдаги боғлар 2026—2027 йилларга бориб Ғафур Ғулом боғи каби аҳолининг энг севимли масканларидан бирига айланади.
Мақсадимиз — ҳар икки боғни ҳам боғ сифатида сақлаб қолиш. Яшиллигини асрашдан иборат. Биз шу ишга киришмасак, ташландиқ, эгасиз бўлиб ётган боғда кўп ўтмай кўп қаватли уйлар кўтарилиши ҳам ҳеч гап эмас, — дейди лойиҳа ташаббускорларидан бири, БМП Смарт Деcисион Management директори ўринбосари Зафар Мирзаулуков.
Таъкидланишича, Тошкент шаҳри ҳокимининг 2024 йил март ойидаги қарорига кўра, ҳар икки боғ БМП Смарт Деcисион Management Ўзбекистон-Сингапур қўшма корхонасига 49 йил муддатга, ҳар бир истироҳат боғига камида 10 миллион доллар инвестиция киритиш шарти билан ижарага берилган.
2023 йил май ойида барча дарахтлари ва яшил майдонлари сақлаб қолинган Ғафур Ғулом боғига таъмирланишидан аввал 30 минг нафар фуқаро борган бўлса, таъмирланиб, замонавий кўринишга келганидан сўнг боғга келувчилар 60 минг нафарга етди. Биз айнан Ғафур Ғулом боғи намунасида ҳар икки боғни ҳам шундай масканга айлантирмоқчимиз, — дейди тадбиркор.
Билдирилишича, Абдулла Қодирий ва “Дўстлик” боғларининг Ғафур Ғулом паркидан асосий фарқи унинг тинч ва сокин маскан бўлиши ҳисобланади.
Ғафур Ғулом боғига 12 миллион доллар сармоя сарфлаб, 43 та янги аттракцион ўрнатгандик. Айни кунда боғда 300 дан ортиқ иш ўрни мавжуд. Ойига давлатга 11 миллиард сўм солиқ тўлаймиз. Боғдаги дарахтларни сақлаб туриш учун ҳар ой 680 миллион сўм харажат қилинади. Аммо бу икки боғимиз Ғафур Ғуломдан фарқли равишда, бу ерда аттракционлар кам бўлади. Боғ шовқин-сурондан ҳоли, тинч маскан қилиниши кўзда тутилган, — дейди Зафар Мирзаулуков.
-mMkzR389.jpg)
Тошкент шаҳри ҳокими ўринбосари Фурқат Маҳмудхўжаевнинг журналистларга билдиришича, шаҳар ҳокимлиги маҳаллий бюджетдан қўшимча маблағ ажратиб, ҳар икки боғни ҳам таъмирлаб, замонавий кўринишга келтиришга қодир эмас. Боиси шундоқ ҳам харажатлар кўп. Шу сабаб бу ишга инвесторлар жалб қилиниб, уларнинг ёрдамида боғни асраб қолиш ҳамда аҳолига қулайлик яратиш масқади кўзланган.
Биз Эски шаҳар аҳолиси оилавий бўлиб келадиган замонавий шаҳар яратмоқчимиз. Шунингдек, уни “Чорсу” бозори билан битта сайёҳлик кластерига бирлаштирмоқчимиз. Ҳозирги кунда шаҳарда бир вақтнинг ўзида барча миллий таомларни замонавий форматда татиб кўриш имкони йўқ. Биз шуни амалга ошириб, боғнинг асосий нуқталаридан бирига айлантирмоқчимиз. Боғни ҳар икки ҳудудга ҳам суқилиб киришга уринаётган қурувчи тадбиркордан ҳимоя қилиб, боғда ҳеч қандай қурилиш ишлари амалга оширилмаслигига эришмоқчимиз. Биз буни Ғафур Ғулом парки мисолида исботладик, — дейди қўшма корхона директори Отабек Мирзажонов.
Пресс-тур давомида қўшимча қилинишича, Яккасарой туманидаги собиқ Бобур, айни кунда “Дўстлик” боғи деб аталаётган ҳудудда шоу ва концертлар учун амфитеатр қайта тикланади. Боғда, шунингдек, шахмат майдончаси, ёга ва воркаут зонаси, бир нечта болалар майдончалари пайдо бўлади.
Боғ ёнидаги Братислава кўчасининг Ўзбек тили ва адабиёти университетидан Конституция кўчасигача бўлган қисми ёпилиб, овқатланиш майдони бор пиёдалар ҳудуди ташкил этилади. Биз ҳар икки боғда ҳам бирорта дарахт кесилмаслигига, яшилликка путур етмаслигига ваъда берамиз. Буни нафақат ОАВ вакиллари, жамоатчлик ҳам кузатиб кўриб бориши учун етарли даражада очиқмиз. Барча саволларга жавоб беришга тайёрмиз, — дейди қўшма корхона директори Отабек Мирзажонов.
Изоҳ (0)