Хитой ва Индонезия Фаластиннинг БМТга аъзолигини қўллаб-қувватлашини маълум қилди

Хитой ва Индонезия ҳукуматлари Фаластин давлатининг БМТга аъзолигини қўллаб-қувватлашини маълум қилди. Бу ҳақда Anadolu нашри батафсил маълумот берди.

Манбада айтилишича, Хитой ташқи ишлар вазири АҚШ расмийларини ўз манфаатларини четга суриб, халқаро ҳамжамиятнинг гапларини диққат билан тинглашга чақирган. Фаластин можаросини ҳал қилишда виждонан иш тутишга чақирган.

Шунингдек, 18 апрель Хитой ва Индонезия расмийлари БМТ Хавфсизлик кенгашидаги овоз беришдан олдин Фаластинни БМТга аъзо бўлишини қўллаб-қувватлашларини бир овоздан эълон қилишган. Икки мамлакатнинг бу борадаги тутган йўли бир хил эканлиги маълум қилинган.

“Хитой ҳам, Индонезия ҳам Фаластиннинг БМТга тўлақонли аъзо бўлишини тўлиқ қўллаб-қувватлайди”, — дея баёнот берган Индонезия ташқи ишлар вазири Ретно Марсуди Жакартада хитойлик ҳамкасби Ван И билан бўлган учрашувдан сўнг журналистларга берган интервьюсида.

Хитой ташқи ишлар вазири Ван И АҚШ ҳукуматини Яқин Шарқ можаросини ҳал этиш учун етарлича билимга эга эмасликда айблаган. Муаммони ҳал эта оладиган янги воситачи кераклигини билдирган.

“Мен Америка ҳукумати амалдорлари асосий билимларни ўрганиши керак, деб ўйлайман”, — деган Хитой расмийси Ван И.

Март ойи охирида АҚШ БМТ Хавфсизлик кенгашига Ғазода ўт очишни тўхтатишга чақирувчи 2728-сонли резолюцияни қабул қилишга рухсат бериб, ўзи овоз беришда бетараф қолган эди. Бироқ резолюция Исроилни анклавдаги шифохоналар ва бошқа фуқаролик тузилмаларини тинимсиз бомбардимон қилишдан тўхтата олмади.

“АҚШ резолюцияни ‘мажбурий эмас’ деб атади ва дунё АҚШнинг гапларидан ҳайратда қолди. Бу шуни кўрсатадики, АҚШ учун халқаро ҳуқуқ фақат улар хоҳлаганча фойдаланадиган воситадир. Бирлашган Миллатлар Ташкилоти низомида Хавфсизлик кенгаши резолюциялари БМТнинг барча аъзолари учун мажбурий эканлиги таъкидланган”, — дейилади Хитой баёнотида бу ҳолатга муносабат билдирилиб.

БМТ Хавфсизлик кенгаши 18 апрель куни Фаластиннинг БМТга тўлақонли аъзо бўлиши учун резолюция лойиҳасини овозга қўйиши эълон қилинган эди. Резолюцияни қабул қилиш учун 9 та овоз талаб қилинади. Шунингдек, ҳужжат қабул қилиниши учун Кенгашнинг беш доимий аъзолари – АҚШ, Буюк Британия, Франция, Россия ва Хитойдан ҳеч бири унга қарши овоз бермаслиги керак.

Фаластин кенгаш тавсиясига эга бўлгач, БМТга тўлақонли аъзо бўлиши учун ташкилот Бош ассамблеяси 193 аъзосининг учдан икки қисми овозини тўплаши керак.