“Бино ва иншоотларнинг зилзилабардошлигини ошириш ҳамда сейсмик хавфни мониторинг қилиш фаолиятини такомиллаштириш чора-тадбирлари тўғрисида”ги президент қарори қабул қилинди. Бу ҳақда Telegram’даги “Ҳуқуқий ахборот” канали хабар берди.
Қарорга кўра:
2024 йил 1 июндан МСК-64 шкаласи бўйича 8 ва ундан юқори баллик сейсмик фаол зоналарда янги қурилиши режалаштирилаётган 5 қаватдан юқори тиббиёт объектлари ҳамда 9 қаватдан юқори биноларни актив сейсмик ҳимоялаш қурилмалари, шу жумладан, сейсмоизоляция ва демпфер ускуналари билан лойиҳалаш амалиёти йўлга қўйилади.
2024 йил 1 июлдан янги қурилиши режалаштирилаётган хавфлилик омили III – IV тоифа бўлган объектларга бино ва иншоотларнинг юк кўтарувчи конструкцияларини автоматик мониторинг қилиш ускунасини ўрнатиш мажбурий этиб белгиланади.
Шунингдек, 2024 йил 1 июлгача республиканинг барча туман ва шаҳарлари ҳудудлари кесимида минтақавий акселерограммалар рақамлаштирилади ҳамда уларнинг онлайн базалари шакллантирилади. 2024 йил 1 августдан хавфлилик омили III – IV тоифа бўлган объектларни ҳудуднинг зилзилалар кучини кўрсатиб берувчи минтақавий акселерограммалар базаларидан келиб чиқиб лойиҳалаш ва қуриш тартиби жорий этилади.
Бундан ташқари, 2024 йил 1 июндан янги қурилиши режалаштирилаётган хавфлилик омили III – IV тоифа бўлган объектларда газ ва электр тармоқларини кучли зилзила пайтида автоматик блоклаш тизими билан лойиҳалаш тартиби жорий этилади.
1 июлгача эса техник ҳолати қониқарсиз деб топилган мавжуд бино ва иншоотларни “компенсацион инъекция технологияси орқали мустаҳкамлаш ва деформацияни олдинги ҳолатига қайтариш” услуби орқали қайта тиклаш ишлари эксперимент тариқасида амалга оширилади. 2024 йил 1 майдан зилзила хавфи ва прогнозига оид хулосаларни ҳар ойда жойлардаги ҳокимликларга киритиш амалиёти йўлга қўйилади.
Қарорга кўра, Фанлар академиясида Зилзила муҳандислиги олимлари ассоциацияси ташкил этилади. Унинг таркибига вазирлик ва идораларнинг соҳага масъул мутахассислари, олимлар, хорижлик мутахассислар киради ва у ҳар уч йилда бир марта янгиланади.
Ўзбекистонда сўнгги 10 йилдаги зилзилалар
Ўзбекистонда сўнгги 10 йилда олти маротаба 6-8 балли зилзила содир бўлган ва улар оқибатида етказилган иқтисодий зарар 84 миллиард сўмни ташкил этган. Шунингдек, мамлакатда ярим йил ичида 50 та кўп қаватли уйлар (тўққиз қаватли ва ундан ортиқ) лойиҳаларининг фақат учтаси маъқулланган. Қолганлари сейсмик талабларга жавоб бермаган ва қайта ишлаш учун юборилган.
Март охирларида Ўзбекистонда яқин кунларда яна зилзила содир бўлиши ҳақида турли хабарлар тарқалганди. Фавқулодда вазиятлар вазирлиги ҳолатга муносабат билдириб, бугунги кунда дунёнинг ҳеч бир давлатида зилзила содир бўладиган сана ва ҳатто тахминий вақтни башорат қила оладиган технологиялар мавжуд эмаслигини, Ўзбекистон сейсмик фаол зонада жойлашгани сабабли баъзида ер силкинишлари содир бўлиши ва ҳар доим шундай бўлганини билдирганди.
Изоҳ (0)