Қирғизистонда TikTok ижтимоий тармоғига кириш чекланади. Маълумотни республика Рақамли ривожланиш вазирлиги тасдиқлади.
Вазирликнинг алоқа соҳасини тартибга солиш ва назорат қилиш хизмати Қирғизистондаги барча интернет-провайдерлардан TikTok’ни чеклашни ва тегишли жавоб қайтаришни сўраган.
Қарорга TikTok томонидан Қирғизистоннинг “Болалар саломатлиги, уларнинг жисмоний, интеллектуал, ақлий, маънавий ва ахлоқий ривожланишига зарар етказилишининг олдини олиш чора-тадбирлари тўғрисида”ги қонунига риоя этилмагани асос бўлди. Қонунда болалар саломатлиги ва ривожланишига зарар етказувчи ахборот турлари белгиланган, — дейилади Рақамли ривожланиш вазирлиги хабарида.
Эслатиб ўтамиз, Қирғизистон расмийлари 2023 йил август ойида TikTok’ни блокировка қилишга уринган. Шундан кейин Маданият вазирлиги томонидан тегишли сўров билан хат юборилган, унда “болалар учун салбий контент ва катталар учун ёлғон хабарлар тарқалиши” ҳақида шикоятлар келтирилган. Кейинроқ Қирғизистон Рақамли ривожланиш вазирлигининг алоқа соҳасини тартибга солиш ва назорат қилиш хизмати ҳеч қандай блокировка бўлмаслигига ишонтирган.
Изоҳ (0)