Тошкентда қарздорлардан техника воситалари ва дўконлар хатланди

Тошкентнинг икки ҳудудида қарздорлардан техника воситалари ва дўконлар хатланди. Бу ҳақда МИБ ахборот хизмати “Дарё”га хабар берди.

Маълум қилинишича, Мажбурий ижро бюросининг Бектемир туман бўлими иш юритувида Жиноят ишлари бўйича Бектемир туман судининг ижро варақасига асосан “F.Т.C.” русумли юк фургони, “Istanbul Fruyehauf” русумли ярим тиркама цистернаси ва КамАЗ юк тортувчи транспорт воситаларини қонуний эгасига қайтариш тўғрисидаги ижро иши мавжуд.

Мазкур иш бўйича мажбурий ижро ҳаракатлари давомида ушбу транспорт воситаларининг фуқарога олиб берилиши таъминланди.

Яна бир ҳолатда, бюронинг Мирзо Улуғбек туман бўлими томонидан қарздор “И.П.”  корхонасидан ундирувчи  “Гарант Банк” АЖ фойдасига 534 миллион 86 минг сўм қарз ундириш ва ундирувни 726 миллион 527 минг 900 сўмга баҳоланган Тошкент шаҳар, Мирзо Улуғбек тумани, Гулсанам кўчасидаги савдо дўкони ва ёрдамчи бино иншоотларининг 2-қават, 4-5-6-7-сонли хоналарга қаратиш белгиланган эди.

Давлат ижрочиси томонидан қарздорга барча ҳуқуқ ва мажбуриятлари тушунтирилиб, ижро ҳужжати талабини бажариши учун ихтиёрий муддат берилган. 

Шундан сўнг ижро ҳаракатлари даврида савдо дўкони ва ёрдамчи бино-иншоотларнинг дўконлари тегишли тартибда хатланиб, реализация ишларига киришилди.