Хонанда Жаҳонгир Отажонов “Мирсодиқова билан” YouTube каналига берган интервьюсида тўйларга чиқиш нархи нега қиммат эканлиги ҳақида гапирди.
— Мен нимага қимматга бораман? Камроқ ишлаш учун! Биринчидан мен кўп пул топиш учун қимматга бормайман, аксинча камроқ ишлаш учун шундай йўл тутаман. Мен ҳозир 5 минг доллар сўрасам, ҳафтасига ёки ойига битта тўйга бораман. Лекин 500 доллар сўрасам ҳар куни 10 та тўйга боришим керак. Мен бундай қилишни хоҳламайман, чунки бундай қилсам қаердадир ўлигим қолади. Сабаби ашула айтиш жуда зарарли инсон учун. Биласиз, балки эшитгандирсиз, нечта-нечта хонандалар тўйда ўлиб қолганини. Масалан, Ортиқ Отажонов инсульт, қандли диабет билан ўлиб кетди. Шерали Жўраев ҳам барибир зарар кўрди, чунки инсонларнинг назари тегади. Одамлар сени касал бўлсин деб назар қилмайди, лекин барибир тегади. Кимдир сени ёмон кўради, кимдир сени “иссиқ-совуқ” қилар балки. Душман ҳам ўзига яраша бўлади. Шунинг учун мен бировдан 5 минг доллар олсам, тўйга бориб соғлом ашула айтишим керак. Кучаниб, қийналиб ашула айтишга менинг виждоним йўл қўймайди. Шу сабаб мен кўп пул сўрайман, қиммат юриш учун эмас. Ҳамма бир хил пул берганидан кейин ҳамма бир хил сифатли мусиқа эшитишга ҳақли. 4 ой тўй “сезони” бўлса, 5 минг олиб қўйиб, 118-куни ёмон аҳволда қийналиб қўшиқ айтишга ҳаққим йўқ.
Хонанда “Тўйларда навбат талашасизми?” деган саволга ҳам жавоб бериб ўтди.
— Мен ҳар доим келишиб бораман. Масалан 20:30 га боришим керак бўлса, шу пайтга бораман. Энди “плюс-минус” бўлади барибир. Лекин кимдир менинг навбатимни олиб қўйса фарқи йўқ. Чунки мен хизмат ҳақини олдиндан олиб, кейин бораман тўйга. Агар менга гал беришса қўшиқ айтаман, гал беришмаса “насиб экан” деб кетавераман. Пулни ҳам қайтариб бермайман, чунки бу менинг айбим эмас. Баъзан тадбирлар бекор бўлиб қолади, шундай ҳолатда ҳам пулни қайтариб бермайман. Чунки мен уйда психологик тайёргарлик кўрган бўламан. Тўйга бориб куйлаш эса мен учун десерт”, — дейди хонанда.
Изоҳ (0)