Туркия президенти Ражаб Тоййиб Эрдўғон мухолифатдаги Республика халқ партияси ғалаба қозонган маҳаллий сайловларга муносабат билдирди. Бу ҳақда Anadolu хабар берди.
Эрдўғоннинг сўзларига кўра, муниципал сайловлар турк демократиясининг кўринишига айланди. У “халқ иродасидан юқори нарса йўқ” эканини таъкидлади.
Натижалар қандай бўлишидан қатъи назар, бу сайловларнинг ғолиби, биринчи навбатда, бизнинг демократиямиз, халқимиз иродаси бўлади. Сайлов марафонида, биринчи навбатда, номзодлар эмас, балки Туркия, сиёсий қарашларидан қатъи назар, мамлакатнинг барча 85 миллион фуқароси ғолиб чиқди, — деди Эрдўғон.
У сайловда иштирок этганларга, сайлов комиссияларининг фидокорона меҳнатига ва хавфсизлик кучларига миннатдорлик билдирди. Туркия президенти турк демократияси ўзининг етуклигини яна бир бор исботлаганини таъкидлади.
Эрдўғон сўзининг сўнггида келгуси тўрт йил мамлакат учун муҳимлигини айтиб, самарасиз муҳокамаларга вақтни беҳуда сарфламасликка чақирди. У демократияни янада мустаҳкамлаш, “муваффақиятларга эришиш ва халққа хизмат қилиш сиёсати орқали мукаммалликни давом эттириш”га чақирди.
Президент Туркияда истиқомат қилувчи ҳар бир фуқаронинг фаровонлиги, хавфсизлиги ва келажагига бўлган умидларини рўёбга чиқариш, мамлакатнинг халқаро ролини мустаҳкамлашдаги ишларни давом эттиришга ваъда берди.
- Туркияда 31 март, якшанба куни муниципалитетлар раҳбарлари сайловида овоз бериш якунланди. Овозларнинг 100 фоизини санаб чиқиш натижаларига кўра, сайловда мухолифатдаги Республика Халқ партияси ғалаба қозонди. У 37,7 фоиз овоз олди. Амалдаги президентнинг ҳукмрон Адолат ва тараққиёт партияси 35,5 фоиз овоз олган. Учинчи ўринни 6,19 фоиз овоз билан “Янги фаровонлик” партияси эгаллади.
- Шу тариқа Туркия сўнгги 20 йил ичида биринчи марта мухолифат ҳукмрон партияни мағлуб этишга муваффақ бўлди. Эрдўғон барча овозлар саналмасданоқ, ўз партиясининг мағлубиятини тан олди.
Изоҳ (0)