Ҳабиб Нурмагомедовга ўлдириш билан таҳдид қилган шахс қўлга олинди 

Доғистон полицияси бир неча кишига ўлим билан таҳдид қилинган видеони ижтимоий тармоққа жойлаган шахсни қўлга олгани айтилмоқда.

“Доғистон республикаси ИИБ Жиноят қидирув департаменти ходимлари 27 ёшли махачқалъалик гумонланувчи фуқарони қўлга олди. Ходимлар томонидан тўпланган материаллар процессуал қарор қабул қилиш учун юрисдикцияга ўтказилди”, — дейилади хабарда.

Гумонланувчи видеода ўлим билан таҳдид қилган инсонлар рўйхатида собиқ UFC чемпиони Ҳабиб Нурмагомедов ҳам бўлган. Лекин у спортчига нега суиқасд қилмоқчи бўлгани номаълум. 

Эслатиб ўтамиз, Ҳабиб Нурмагомедов 2020 йилнинг 24-октябрида UFC 254 мусобақасида октагондаги охирги жангини ўтказган. Ушбу мусобақадаги жанг орқали Ҳабиб кетма-кет учинчи бор чемпионлик камарини ҳимоя қилган. Унга Жастин Гетжи рақиблик қилганди. Нурмагомедов Гетжини буғиш усули билан муддатидан олдин мағлуб этган. Бу доғистонлик жангчининг 29-ғалабаси эди.