Тошкент шаҳри ва Самарқанд вилоятида кучли таъсир қилувчи дори воситаларининг муомалага киритилишига чек қўйилди. Бу ҳақда Бош прокуратура ҳузуридаги департамент хабар берди.
Қайд этилишича, департаментнинг Самарқанд шаҳар бўлими томонидан ИИБ ходимлари билан ҳамкорликда тезкор тадбир ўтказилган. Тадбирда “Л.Ш.” номли дўкон сотувчиси А.З. жами 188 дона “Редуксин лайт” номли дори воситасини фуқаро О.С.га 1 миллион сўмга сотган вақтида ушланиб, ушбу дўкондан жами 1 648 дона кучли таъсир қилувчи дори воситалари ашёвий далил сифатида олинган.
Шу каби, департаментнинг Яккасарой, Чилонзор тумани бўлимлари ҳамда ДХХ ва ИИББ ходимлари ҳамкорлигида ўтказилган тезкор тадбирларда фуқаролар К.Х., Ш.А. ва бошқалар ноқонуний даромад орттириш мақсадида жами 543 дона кучли таъсир қилувчи дори воситаларини сотаётган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 251-1-моддаси (кучли таъсир қилувчи ёки заҳарли моддаларни қонунга хилоф равишда муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Навоий, Қашқадарё вилоятлари ва Тошкент шаҳрида кучли таъсир қилувчи дори воситаларини муомалага киритилишининг олди олингани тўғрисида хабар берилганди.
Изоҳ (0)