Жорий йилнинг 21 март куни Жейк Жиллинҳол ва UFC собиқ чемпиони Конор Макгрегор иштирокидаги “Йўл бўйидаги уй” фильми премьераси бўлиб ўтди. Ушбу фильм ирландиялик спортчи учун кинодаги дебют бўлди.
Конор ўзини кинода синаб кўрган ягона UFC жангчиси эмас. Ундан олдин ҳам бу амалиётни кўпчилик спортчилар бошидан ўтказган. Қуйида Голливуд фильмларида иштирок этган UFC жангчиларини ёдга оламиз.
Валентина Шевченко Ҳолли Беррининг режиссёрлик дебютида рол ўйнаган
UFC собиқ чемпиони Шевченконинг кинодаги илк ва ҳозирча ягона бўлиб турган иштироки 2020 йилда бўлган. Валентина “Зарбалар” драмасида салбий қаҳрамон образини гавдалантирган. Фильм фаррош бўлиб ишлаётган ва MMA’га қайтишга ҳаракат қилаётган собиқ UFC жангчиси ҳақида ҳикоя қилади. Фильмда бош ролни ижро этган Ҳолли Беррининг режиссёрлик дебюти бўлган. Берри MMA’нинг ашаддий мухлиси ва бир неча бор UFC жангларини томоша қилиш учун бориб турган.
“Беррининг режасига кўра, барчаси ҳаётий бўлиши керак эди. У жанг ҳақиқий бўлиши кераклигини айтди. Иложи борича ишончли кўрсатишга уриниш керак эди. Баъзида у “Валентина, сен мени қаттироқ уришинг керак”, дерди. Мен эса бундай қилишга қўрқардим. Аммо Ҳолли буни талаб қиларди”, — сьёмка жараёнидан хотираларини бўлишади Валентина.
Netflix платформаси фильм ҳуқуқини 20 миллион долларга сотиб олган. IMDb рейтингида фильм 6,1 балл олган.
Жорж Сен-Пьер “Қасоскорлар” фильмида Капитан Америка билан жанг қилган
Сен-Пьернинг кинодаги дебюти 2009 йилда бўлган. Спортчи “Ҳеч қачон таслим бўлма” фильмида ўйнаган. Орадан 5 йил ўтиб, “Биринчи қасоскор 2” фильмида Жорж Батрок ролини ижро этган. Сен-Пьер экранда кўп кўринмаса-да, унинг Капитан Америка билан жанги томошабинлар ёдида қолган.
UFC’нинг 3 карра чемпиони 2021 йил “Лочин ва Қишки аскар” мини-сериалида Батрок образига қайтган. Бунга қадар эса Жорж машҳур “Кикбоксчи” ремейки ва Стивен Сигал иштирокидаги “Салазарнинг ўлими” фильмларида рол ижро этган.
Френсис Нганну “Форсаж”да рол ижро этган
Оғир вазн тоифасида собиқ UFC чемпиони “Форсаж”нинг 9-қисмида эпизодик ролда иштирок этади. Фильм жаҳон прокатида 720 миллион доллар даромад кўради.
“Бу жуда катта тажриба бўлди. Бунга қадар кинода рол ўйнамаганман, шунинг учун мендан талаб қилинган нарсани чиқариб беришим қийинроқ кечган.
Лекин улар сабр қилишди. Кино — мен учун улкан тажриба майдони бўлди”, — деган эди Нганну.
Майкл Биспинг Вин Дизель билан бир фильмда иштирок этган
Ўрта вазн тоифасида собиқ UFC чемпиони Биспинг 2014 йилда кинода дебют қилган. “Пластик” номли комедияда эпизодик рол ўйнаган. Орадан 3 йил ўтиб, “Уч икс: Дунё ҳукмронлиги” фильмида Вин Дизель билан биргаликда ўйнаган. Майкл 2019 йилда “Уч томонлама таҳдид”, 2021 йилда эса “Ҳеч қачон таслим бўлма” фимларида рол ижро этган.
2024 йилда Биспинг ижросидаги иккита фильм дунё юзини кўради, улардан бири “Қизил Соня” фентези фильми. Майкл унда асосий роллардан бирини ижро этган. Шунингдек, Биспинг бўш вақтларида UFC турнирларида шарҳловчи ва эксперт сифатида иштирок этмоқда.
Ренди Кутюр “Чегарасизлар” фильмида Сталлоне ва Стэтхем билан бирга ўйнаган
Бир неча карра UFC чемпиони спортчилик фаолияти давомидаёқ киноларда рол ижро этишни бошлаган. Дастлаб, Жет Ли иштирокидаги “Бешикдан то қабргача” фильмида эпизодик рол ўйнаган, ундан сўнг “Енгиб ўтиш” драмасида, “Катта Стен” комедияларида ҳам катта-кичик ролларни ўйнаган. 2008 йилда эса Кутюр “The Scorpion King: Books of souls” фильмида салбий қаҳрамон образини гавдалантирган. Спортчилик фаолиятини якунлаганидан сўнг кинолойиҳаларда иштирокини мунтазам давом эттирди.
“Чегарасизлар” фильмидаги роли эса Кутюрга муваффақият олиб келди. Ренди шу вақтга қадар 30 дан ошиқ фильмларда рол ўйнаган. 2023 йил эса у учун омадли келди: 3 та фильм ва битта сериалда рол ижро этди.
Ронда Роузи “Чарли фаришталари” фильмида ўйнаган
UFC чемпиони 2013 йилда промоушенда дебют қилади ва орадан бир йил ўтиб Силвестр Сталлоненинг “Чегарасизлар 3” фильмида ўйнайди. Кейинчалик “Форсаж 7” да ҳам Роузи кўриниш беради. 2019 йилда эса янгиланган “Чарли фаришталари” фильмида жанг санъати устаси ролини ўйнади.
Ронда, шунингдек, “Антураж”, “22 миля” фильмларида ҳам рол ижро этган.
Сўнгги вақтларда Ронда киноларда кўриниш бермаяпти. У ҳозирда турмуш ўртоғи билан биргаликда фермада яшамоқда. У ҳозир бахтлилигини, ҳайвонларни яхши кўришини ва Голливудни соғинмаётганини билдирган.
Изоҳ (0)