“Ўзгидромет” яна сел-сув тошқини юзага келишидан огоҳлантирди

“Ўзгидромет” 26—30 март кунлари кутилаётган ноқулай об-ҳаво шароитидан огоҳлантирди.

Маълум қилинишича, 26—30 март кунлари Ўзбекистон ҳудуди бўйича вақти-вақти билан ёмғир ёғади, баъзи жойларда кучли бўлади. Момақалдироқ бўлиши мумкин.

26—28 март кунлари шамол тезлиги 15-20 метр/секундгача кучаяди, айрим жойларда баъзида 22-25 метр/секундгача кучайиши мумкин.

Кутилаётган кучли ёмғирлар ёғиши сабабли, 26—31 март кунлари республиканинг тоғолди ва тоғли ҳудудларида сел-сув тошқин ҳодисалари юзага келиши мумкин.

Тоғолди ва тоғли ҳудудларда истиқомат қилувчи фуқаролар, дам олувчилар ҳамда тоғли ҳудудларда ҳаракатланувчи ҳайдовчилардан эҳтиёткорлик чораларини кўришларини сўраймиз”, — дейилади хабарда.

Шунингдек, Республика ҳудуди бўйича ёмғир сувлари тўпланиш эҳтимоли бор, бу эса ҳудудларни сув босишига олиб келиши мумкин.

Ўзбекистонда 20—22 март кунлари ҳам сел-сув тошқини хавфи эълон қилинганди. 21 март куни Сурхондарё вилоятининг Қумқўрғон туманида сел-сув тошқини юз бериб, юздан ортиқ хонадонларни сув босди.