АҚШ Миллий хавфсизлик бўйича маслаҳатчиси Жейк Салливан Киевга ташрифи чоғида АҚШ Конгресси Украинага қўшимча ҳарбий ёрдам пакетини эртами-кечми албатта маъқуллашини маълум қилди. Бу ҳақда CNN нашри хабар берди.
Хабарда айтилишича, Киевга келган Жейк Салливан Украина президенти Владимир Зеленский идора раҳбари Андрей Ермак билан учрашган. Учрашувда у ҳарбий ёрдам пакети ажратилишига қатъий ишонч билдирган бўлса-да, бу воқеанинг айнан қачон рўй бериши ҳақида маълум қилмаган.
“Ишончимиз комилки, биз Украинага ёрдам пакети ажратиш учун Вакиллар Палатасида кучли овозга эга бўламиз ва маблағ олишга эришамиз. Бу жуда узоқ давом этиши мумкин. Мен бу аниқ қачон бўлишини башорат қилолмайман. Бироқ, бу амалга ошади”, — деган Жейк Салливан.
Ўтган ойда АҚШ Сенати Украинага 60 миллиард долларлик ҳарбий ёрдам ажратишни назарда тутувчи қўшимча қонун лойиҳасини маъқуллаган эди. Бироқ Вакиллар палатаси спикери Майк Жонсон уни овозга қўйишдан бош тортди.
Жейк Салливаннинг ташрифи Оқ уй қўшимча 300 миллион долларлик ҳарбий ёрдам эълон қилганидан бир ҳафта ўтгач содир бўлмоқда. Украина томони ҳам, бир қатор АҚШ расмийлари ҳам бу миқдордаги ёрдам ҳеч нарсага етмаслигини маълум қилган.
Изоҳ (0)