Ўзбекистон Индонезия Аёллар имкониятларини кенгайтириш ва болаларни ҳимоя қилиш вазирлиги билан ҳамкорлик қилади. Бу ҳақда Оила ва хотин-қизлар қўмитаси хабар берди.
Унга кўра, 13 март куни Оила ва хотин-қизлар қўмитаси раиси Озода Парпибаева Нью-Йорк шаҳрида Индонезия Аёллар имкониятларини кенгайтириш ва болаларни ҳимоя қилиш масалалари бўйича вазир ўринбосари билан учрашув ўтказди. Учрашувда Ислом ҳамкорлик ташкилотига (IXТ) аъзо давлатларнинг тегишли идоралари ҳамда жамиятлари иштирокида хотин-қизларнинг жамият ҳаёти ва давлат бошқарувидаги ўрнини кучайтириш бўйича Оила ва хотин-қизлар қўмитаси ўртасида ўзаро англашув меморандумини имзолаш ҳамда 12—14 март кунлари Осиё аёллар форумида иштирок этиш масаласи муҳокама қилинди.
Оила ва хотин-қизлар қўмитаси ҳамда Индонезия Аёллар имкониятларини кенгайтириш ва болаларни ҳимоя қилиш вазирлиги ўртасида қуйидаги йўналишлар билан ҳамкорлик йўлга қўйилади:
- илмий-техникавий, ижтимоий-маданий, иқтисодий, таълим, гуманитар, туризм ва томонларни қизиқтирган бошқа соҳалардаги ҳамкорликни мустаҳкамлаш ва ривожлантиришга кўмаклашиш;
- хотин-қизларнинг жамиятдаги ҳуқуқлари, манфаатлари ва қадр-қимматини ҳимоя қилиш, уларнинг ижтимоий-сиёсий ва маданий ҳаётдаги ролини оширишга кўмаклашиш;
- миллий анъаналарни асраб-авайлаш, оила институтини мустаҳкамлаш, хотин-қизлар тадбиркорлигини ривожлантириш;
- халқаро ва минтақавий ташкилотларнинг тадбирлари ҳамда форумлари доирасида ўзаро манфаатли масалаларни муҳокама қилишда мунтазам учрашувлар ўтказиш, бир-бирини қўллаб-қувватлаш ва ёрдам кўрсатиш каби масалаларда ҳамкорлик ўрнатиш бўйича келишилди.
Изоҳ (0)