Тошкентда Осиё от спорти федерациясининг навбатдаги бош ассамблеяси ўтказилди

5—8 март кунлари Тошкентда  Осиё от спорти федерациясининг навбатдаги бош ассамблеяси бўлиб ўтди. Мазкур тадбир Ўзбекистон от спорти тарихида биринчи марта ўтказилиши ҳисобланади.

Ўзбекистон Республикаси йилқичилик ва от спорти федерацияси 2023 йил 25—28 февраль кунларида Қатар давлатининг Доҳа шаҳрида ўтказилган ассамблеяда кейинги йиғилишни Ўзбекистонда ўтказиш ҳуқуқини олган эди. Ушбу тадбир Ўзбекистон от спорти тарихида илк маротаба ўтказилмоқда. 

“Тошкентдек чиройли шаҳарга таклиф қилгани, ажойиб тайёргарлик ва меҳмондорлик учун Ўзбекистон ҳукуматига раҳмат. Бу йил ҳисобида бу тадбир биз учун жуда муҳим эди.

Ўзбекистонга биринчи маротаба келишимиз. Ўтказилган тадбирлар давомида гуруҳлар учун кичик тайинловлар ўтказдик. Шунингдек, айрим аъзолари билан тақдимотларни ҳам ташкил қилдик. 

Учрашувларда биз Осиёнинг барча жамоаларини кўрдик. Менимча, бу жамоалар тезкорликда ривожланиб боришяпти, биз уларни ҳақиқатда қўллаб-қувватлаш жараёнидамиз. Қолаверса, минтақа миқёсида бу жамоаларни саралаш режамиз ҳам бор. Ўзбекистон от спорти жамоалари ҳақида гапирсак, улар жуда яхши ишлашмоқда. Келгуси 3—4 йилда улар От спорти федерациясининг қўллови билан дунё мамлакатларининг энг яхши вакиллари бўлиб мусобақаларда иштирок этишига ишонаман”, — деди Осиё от спорти федерацияси президенти шайх-Ҳамад ал-Аттиях.

Ўзбекистон йилқичилик ва от спорти федерацияси Раиси Баҳромжон Газиев от спортининг ютуқлари ҳақида гапирди:

“Кеча Осиё от спорти раиси кубогини ўтказдик. Дунёнинг турли мамлакатларидан келган меҳмонлар бу тадбирни томоша қилишди, чавандозларимизни, отларимизни, янги қурилаётган масканимизни кўришди. 

2023 йилнинг ноябрь ойидан март ойигача Араб давлатларида мусобақаларда қатнашиб келдик. Қатарда, Абу Дабида, Дубайда ўтказилган мусобақаларда яхши натижаларга эришиб келдик. Ҳозир Европа давлатларида, Россиянинг баъзи шаҳарларида отларимиз бор, халқаро мусобақаларда қатнашиб Ўзбекистон байроғи юқори кўтарилишига ҳисса қўшишяпти”. 

Бош Ассамблея мажлисида 38 та Осиё от спорти федерациясига аъзо федерациялар Раис ва Бош котиблари иштирок этишди. 

Осиё от спорти федерацияси Бош котиби Бадр бин Муҳаммад Ал Дарвиш Ўзбекистонда от спортининг келажагини юқори баҳолади:

“Илиқ ва самимий меҳмондўстлик учун Ўзбекистонга миннатдорчилик билдираман. Тадбир жуда чиройли, мулоқотларга бой ўтяпти. Бу ерда от спортига қизиқиш жуда катталиги кўриниб турибди, айниқса ёшлар орасида бу спорт турининг келажаги яхши натижалардан дарак беради. Кеча тадбир иштирокчиларига от спорти билан шуғулланувчи ёшлар гуруҳининг ўйинлари намойиш этилди. Бу чиқишлар бизни ҳайратда қолдирди. Агар солиштирадиган бўлсак, Марказий Осиё мамлакатлари орасида ўзбекистонлик спортчилар етакчи ҳисобланади”, деди у.

Анжуман давомида 2026 йилда Япониянинг Нагоя шаҳрида ўтказиладиган 20-ёзги Осиё ўйинлари доирасида от спорти тақдимоти ўтказилди ва муҳокама қилинди.

Реклама ҳуқуқи асосида