АҚШ ва Буюк Британия Ташқи ишлар вазирликлари ўз фуқароларини яқин икки кун ичида Москвадаги одамлар гавжум жойларда терактлар содир этилиши хавфидан огоҳлантирди. Латвия, Канада, Жанубий Корея, Швеция, Германия ва Чехия огоҳлантиришга қўшилди. Бу ҳақда Euronews хабар берди.
“Элчихона экстремистларнинг Москвадаги гавжум жойларга, жумладан, концертларга ҳужум қилиш режалари ҳақидаги хабарларни кузатиб боради. АҚШ фуқароларига 48 соат давомида одамлар тўпланган жойдан қочиш тавсия этилади”, — дейилади АҚШнинг Москвадаги элчихонаси баёнотида.
Буюк Британиянинг Россиядаги элчихонаси фуқароларига Россияга ҳар қандай ташрифдан тийилишни маслаҳат берган.
Огоҳлантириш Россия Федерал хавфсизлик хизмати Москвадаги синагогаларга ҳужум қилишни режалаштирган “Исломий давлат” (ИШИД) террорчилик гуруҳининг ячейкасини зарарсизлантирганини маълум қилганидан бир неча соат ўтиб берилган.
АҚШнинг Россиядаги элчихонаси таҳдиднинг моҳияти ҳақида қўшимча маълумот бермаган, бироқ атрофдагилардан огоҳ бўлишлари кераклиги таъкидланган. Латвия, Канада, Жанубий Корея, Швеция, Германия ва Чехия яқин икки кун ичида Москвадаги терактлар хавфи ҳақидаги огоҳлантиришга қўшилган, деб ёзади DW.
Изоҳ (0)