Ўзбекистонда 2019 йилдан ҳозирга қадар Олий суднинг қарори асосида 1 000 дан ортиқ манба тақиқланган. Бу ҳақда Олий суд ахборот хизмати раҳбари Азиз Обидов маълум қилди.
Қайд этилишича, 2019 йилдан бугунги кунга қадар Олий суднинг 80 дан зиёд ҳал қилув қарори асосида интернет тармоғидаги, хусусан, Меtа (Facebook), “Одноклассники”, Instagram ва TikTok ижтимоий тармоқлари, Telegram мобил мессенжери, YouTube видеохостинги ва бошқа 1 000 дан ортиқ манба ва улардаги материаллар диний ақидапарастлик, экстремистик ва террористик ғояларни тарғиб этишга йўналтирилган деб топилиб, уларни Ўзбекистон ҳудудида тайёрлаш, тарқатиш, сақлаш, олиб кириш ва намойиш этиш тақиқланган.
Жиноят кодексининг 244-1-моддасига мувофиқ диний экстремизм, сепаратизм ва ақидапарастлик ғоялари билан йўғрилган, қирғин солишга ёки фуқароларни зўрлик билан кўчириб юборишга даъват этадиган ёхуд аҳоли орасида ваҳима чиқаришга қаратилган материалларни тайёрлаш ёки уларни тарқатиш мақсадида сақлаш, шунингдек диний-экстремистик, террорчилик ташкилотларининг атрибутларини ёки рамзий белгиларини тарқатиш ёхуд намойиш этиш мақсадида тайёрлаш, сақлаш базавий ҳисоблаш миқдорининг 200 бараваридан 400 бараваригача жарима ёки уч йилгача ахлоқ тузатиш ишлари ёхуд бир йилдан 3 йилгача озодликни чеклаш ёки уч йилгача озодликдан маҳрум қилиш билан жазоланади.
Диний ақидапарастлик, экстремизм ва терроризм тузоғига тушиб қолишдан доимо сақланинг. Улар ҳаётингиз ва орзуларингизни барбод қилишига асло йўл қўйманг. Суд томонидан тақиқланган интернет манбалардан йироқ бўлинг, — дейилади хабарда.
Эслатиб ўтамиз, 2023 йилнинг май ойида Жиззахда 19 ёшли йигит тақиқланган диний материал тарқатгани учун судлангани, шунингдек, Фарғонада ижтимоий тармоқда диний мазмундаги маърузаларни тарқатиб келган шахс жаримага тортилгани тўғрисида хабар берилганди.
Изоҳ (0)