АҚШ Олий суди бир овоздан собиқ президент Дональд Трампни қўллаб-қувватлади ҳамда уни Республикачилар партиясининг праймеризларида иштирок этишига рухсат берди.
Шу тариқа Олий суд Колорадо судининг қарорини бекор қилди. Унга кўра собиқ президент 2021 йил 6 январда Капитолийга қилинган ҳужумда иштирок этгани учун сайловда қатнаша олмаслиги белгиланганди.
Олий суд қарорига кўра, штатлар фуқароларни президентлик сайлови учун номзодлар рўйхатидан чиқариб ташлашга ҳақли эмас. АҚШ конституциясига кўра, бу қарорни фақат Конгресс қабул қилиши мумкин.
Washington Post газетасининг таъкидлашича, Олий суд одатда ой охирида ўз қарорларини чиқаради. Бироқ Дональд Трамп мисолида истисно қилинган. Қарор 5 март куни бўлиб ўтадиган “Супер сешанба” кунидан бир кун олдин эълон қилинди. Шу куни бирданига 15 штатда праймеризлар ўтказилади.
Дональд Трампнинг праймеризда иштирок этишини тақиқлаш қарори аввалроқ Колорадо, Мен ва Иллинойс штатларида қабул қилинган эди. Барча ҳолатларда тақиқ АҚШ конституциясининг 14-моддаси билан изоҳланган, унга кўра мансабдор шахслар қўзғолонда қатнашган бўлса, давлат лавозимларини эгаллаши мумкин эмас.
Изоҳ (0)