Ўзбекистон Марказий банки 2024 йил февраль ойи учун истеъмол кайфияти шарҳини эълон қилди. Тадқиқотда респондентларнинг даромад ва харажатлари, уларнинг жамғармага мойиллиги, шунингдек, келажакдаги эҳтиёжлари таҳлил қилинган.
Қайд этилишича, 2024 йилнинг январь ойида ўтказилган сўров натижаларига кўра, аҳолининг келгуси 12 ойдаги иқтисодий кутилмалари III чоракка нисбатан сезиларли даражада яхшиланган. Хусусан, даромад ва харажатлари бўйича кутилмалари ҳамда жамғаришга мойиллиги охирги 3 йилдаги энг юқори даражага кўтарилган.
Сўровда иштирок этган аҳоли вакилларининг 73 фоизи келгуси 12 ойда даромадлари ошишини кутмоқда. Бу кўрсаткич аввалги чоракка нисбатан 8 фоиз бандга юқорироқни ташкил этган. Шунингдек, даромадлари ўзгармаслигини қайд этганлар улуши 4 фоиз бандга камайиб, жами респондентларнинг 21 фоизини, келгусида даромадлари камайишини таъкидлаганлар ҳам 4 ф.б.га камайиб, 6 фоизни ташкил этган.
Ўзбекистонликларнинг аксарият қисми маблағларини уй-жой таъмири (14,2 фоиз), таълим (14,1 фоиз), автомобиль (8,4 фоиз), даволаниш (11,3 фоиз), уй-жой хариди (4,3 фоиз) ҳамда маиший техника харидига (6,8 фоиз) сарфлаган.
Келгуси ойларда респондентларнинг 16,1 фоиз пул маблағларини уй-жой таъмирига, 12,8 фоизи — таълимга, 8,1 фоизи — автомобиль харидига, 8,5 фоизи — даволанишга, 10,8 фоизи — кўчмас мулкка, 6,2 фоизи — тўйга сарфлаш ниятида.
Эслатиб ўтамиз, 2023 йил март ойида ПМТИ экспертлари Ўзбекистонда инсонларнинг ҳаёти давомида истеъмол харажатлари ва даромадлари, ўзгариш хусусиятлари ҳамда қарз муносабатларига киришиш ҳолатини таҳлил қилганди. Унга кўра, мамлакатдаги ёш оилалар даромадининг асосий қисмини қарз тўлашга сарфлаётгани маълум бўлган.
Изоҳ (0)