Бутун Қозоғистон бўйлаб 1 март, жумага ўтар кечаси UTC+5 ягона вақти расман ўрнатилди. Мамлакат ҳукумати қарорига кўра, Остона, Олмаота ва Чимкент шаҳарларида, шунингдек, Оқмўла, Олмаота, Жамбил, Қарағанда, Қўстанай, Павлодар, Шимолий Қозоғистон, Туркистон, Ш. Шарқий Қозоғистон, Абай, Жетису ва Улитау вилоятларида соат миллар бир соат ортга сурилди. Бу ҳақда DW хабар берди.
Илгари Қозоғистонда иккита вақт зонаси, хусусан, - UTC+5 ва UTC+6 мавжуд бўлган, ҳудуднинг катта қисми UTC+6 зонасида жойлашган. Соат ўзгаргандан сўнг бутун Қозоғистон Европага бир соат яқинроқ бўлди.
Қозоғистоннинг 2020 йилдаёқ ягона вақт минтақасига ўтиши ташаббускори Олмаотада жойлашган Василий Фесенков номидаги Астрофизика институти бўлган. Астрофизиклар ўз таклифларини мамлакатнинг аксарият қисми ўз табиий вақтига қараб яшамаслиги билан асослаган.
Ҳукуматга кўра, UTC+5 га ўтиш энг тўғри ва мақбул қарор.
Қозоғистонда ягона вақт минтақасини жорий этиш қарори мамлакат аҳолисининг бир қисмининг норозилигига сабаб бўлди. Ҳукуматнинг 2000 йилда қабул қилинган “Қозоғистон Республикаси ҳудудида вақтни ҳисоблаш тартиби тўғрисида”ги қарорга ўзгартиришлар киритиш лойиҳаси муҳокамаси статистикаси шундан далолат беради.
2023 йил 22 декабрда бошланган лойиҳанинг уч соатлик онлайн муҳокамасида Қозоғистоннинг 87 нафар фуқароси ягона вақт минтақасига ўтиш учун, 945 нафари эса қарши овоз берган. Шу билан бирга, ҳукумат модераторлари яна 2000 га яқин қозоғистонликларнинг овозларини кўриб чиқишдан бош тортган.
Изоҳ (0)