Наманган ва Сурхондарё вилоятларида ноқонуний йўллар билан ўқишга киритиб қўйишни ваъда қилган шахслар ушланди, деб хабар беради Бош прокуратура ҳузуридаги департамент.
Қайд этилишича, департаментининг Мингбулоқ туман бўлими томонидан терговга қадар текширув ўтказилган. Текширувда Ў.Н. исмли шахс фуқаролар Д.Э. ва А.Д.нинг ишончига кириб, гўёки юқори лавозимда ишловчи танишлари ёрдамида уларнинг Россия ҳамда қўшни Қирғизистондаги ўқишини Наманган вилоятидаги олий таълим муассасаларига кўчириб беришини айтиб, эвазига 4,5 минг долларни фирибгарлик йўли билан қўлга киритгани аниқланган.
Шу каби, департаментнинг Сурхондарё вилоят бошқармаси, ДХХ ва ИИБ ходимлари ҳамкорлигида ўтказилган тезкор тадбирда М.М. исмли шахс фуқаро М.У.нинг ишончига кириб, уни танишлари ёрдамида Қарши шаҳридаги Халқаро Инновацион университетининг 3-босқичига ўқишга киритиб қўйиши эвазига 1 000 доллар ва 1,2 миллион сўмни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Бундан олдин Бухоро ва Фарғона вилоятларида ўқишни кўчириб бериш билан боғлиқ фирибгарлик ҳолатларига чек қўйилганди. Шунингдек, Ўзбекистоннинг қатор ҳудудларида ўқишга киритиб қўйиш учун пул олган ОТМ ходимлари қўлга тушган эди.
Изоҳ (0)