Бокс оламида дунёнинг энг яхши боксчиси ким эканлиги ҳақида ҳар доим баҳслар бўлиб туради. Кимдир Муҳаммад Алини энг юқори чўққига кўтарса, бошқалар Жо Луис ҳақида илиқ фикрлар билдиради. Яна бир гуруҳ одамлар эски ва янги давр бокс оламини бир-бири билан солиштиришнинг иложи йўқ деб ҳисоблаб, жаҳон тарихидаги энг яхши боксчи исмини алоҳида айтишнинг иложи йўқ деб ҳисоблайди.
Албатта, фикрлар турлича бўлиши табиий. Ушбу мақолада, жуда кўпчилик Муҳаммад Алидан юқорироқ поғонага қўядиган Шугар Рей Робинсон ҳақида 7 факт тақдим этилади.
Дўстининг номи билан танилган боксчи
Боксчи туғилганида унга кичик Уолкер Смит исми берилди. Аввалига, Смит доктор бўлишни хоҳлади, аммо тўққизинчи синфни тугатгач бокс билан шуғулланишга қарор қилди. У 14 ёшида бокс турнирида қатнашмоқчи бўлади. Транспорт чиптаси 16 ёшдан бошлаб берилиши сабаб у бу ишда муаммога дуч келади.
У бундай тақиқни четлаб ўтиш йўлини топади. Бунда унинг дўсти Рей Робинсон ёрдамга келади. Жо Луис дўстининг номига чипта олади. Айнан унинг исми кейинчалик боксчининг келажакдаги исмини белгилаб берди.
Боксчи 16 ёшида уйланиб, 3 йилдан кейин ажрашган
Робинсон 16 ёшида уйланди. Ёш оилани фарзанд ҳам сақлаб қола олмади. Уч йил ўтгач улар ажрашди. Бунга боксчининг рингдаги эмас кўчадаги ҳаёти сабаб бўлган. Робинсон кўча безорилар гуруҳига қўшилиб кўплаб жанжалларда қатнашган.
Ҳаваскор боксда мисли кўрилмаган рекорд
Рейнинг ҳаваскор боксдаги фаолияти таҳсинга сазовор. У 85 бор ғалаба қозонган ва жангларнинг 69 тасида рақибини нокаутга учратган. Шугар кўпинча рақибини биринчи раунддаёқ нокаутга учратган.
Фақатгина бир бора мағлубиятни қабул қилиб олган.
Жо Луиз билан бирга армияда хизмат қилган, аммо ақли заифлиги сабаб четлатилган
Уч йиллик профессионал фаолият давомида 46 жангда қатнашган боксчи АҚШ армиясига чақирилади. Армияда Жо Луиз билан бирга хизмат қилади, улар баъзида кўргазмали жанглар ҳам уюштиради.
Ўзининг ҳақиқий исми билан ҳарбий хизмат қилаётган боксчига турнирларда иштирок этиш таклифи берилади. Аммо боксчи ушбу турнирларни томоша қилиш афроамерикаликларга тақиқланганидан хабар топиб, турнирларда иштирок этишдан бош тортади. Айнан мана шу сабаб, докторлар унга “ақли заиф” ташхисини қўяди ва 1944 йилнинг июнида боксчини демобилизация қилишади.
Туши ўнгидан келган ва рақибини рингда ўлдириб қўяди
Ярим ўрта вазн тоифасида жанг қилувчи Шугарга жаҳон чемпионлиги унвонининг биринчи ҳимояси жуда оғир кечади. 1947 йилдаги жангда у жуда катта руҳий зарба олади. Жимми Дойл билан жангдан бир неча кун олдин Шугар Рей Робинсон туш кўради ва тушида рақибини ўлдириб қўяди. Туши сабаб у жангда иштирок этишни хоҳламайди. Руҳонийлар ва вазир ёрдамида Робинсон жангга рози қилинади.
Натижада Шугар Дойлни “хук” зарбаси билан нокаутга учратади. Боксчи бир неча соат ўтиб шифохонада вафот этади. Шу жангдан сўнг Робинсон рақибларини ўлдириб қўйишдан ҳайиқиб бор кучи билан зарба бера олмай қолади.
Эътиборлиси, боксчи айнан шу жанг ва бундан ташқари бир нечта жангдан тушган фойдаларни Дойлнинг оиласига ҳадя қилади.
Биргина жангда муддатидан олдин мағлуб бўлган
Рей Робинсон фақатгина бир зарбадан кейин қайта тура олмаган. Тўғри, ушбу жанггача боксчи мағлубиятга учраган, лекин жангларни охирига еткиза олган. Жои Максим билан бўлган жангда Робинсон нокаутга учради ва спортчи жаҳон чемпионлиги камарини ҳимоя қила олмади.
Қашшоқликдаги ҳаёт
Боксдаги фаолиятини тугатгач Рей Робинсон ҳеч вақосиз қолиб кетди. У 4 миллион доллардан ортиқ пулларни боксчилик фаолияти давомида сарфлаб юборишга улгурган эди. Ўз фаолиятини тугатганидан бир ой ўтиб, унинг шарафига “Шугар Рей Робинсон кечаси” ўтказилди ва унга жуда йирик соврин тақдим этилди.
Аммо Рейнинг сўзларига қараганда, унинг Манхеттендаги уйида ушбу мукофотни жойлашга бирор мебели бўлмаган. Қариган чоғида унга Альцгеймер ташхиси қўйилади.
Боксчи 67 ёшида вафот этади.
Робинсон профессионал боксда 200 жанг ўтказди, шундан 173 тасида ғалаба қозонди. Ғалабаларнинг 108 тасида рақибларини нокаутга учратган. 19 та учрашувда рақибларига мағлуб бўлган. 6 учрашувда дуранг қайд этган боксчининг икки жангги ўтказилмаган деб ҳисобланган.
The Ring журнали 2002 йилда Шугарни жаҳоннинг энг яхши боксчиси деб ёзади.
Муҳаммад Али ҳам ўзининг баъзи жанг услубларини Рейдан олгани ҳақида айтиб ўтади. “У — қирол, мастер, менинг идеалим”, — деган эди бокс афсонаси.
Изоҳ (0)