Собиқ соғлиқни сақлаш вазири Амрилло Иноятов 2023 йилнинг январь ойида 2023 йилдан бошлаб, давлат тиббий суғурта тизимини Тошкент шаҳрида жорий қилиш учун барча имкониятлар мавжудлигини, бундан ташқари вазирлик ўзига мажбурият олган ҳолда Навоий вилоятида ҳам тиббий суғуртани йўлга қўйилишини маълум қилган эди.
Бунинг учун:
- бир ой муддатда тиббий суғурта тизимини жорий этиш бўйича қарор ишлаб чиқилиши;
- Тошкент шаҳридаги 72 та поликлиника ва 40 та шифохонани компьютер жиҳозлари, зарур тиббий ускуналар билан таъминлашга 30 миллиард сўм йўналтирилиши;
- пойтахтда 2023 йил 1 июлдан тиббий суғурта тизими механизмлари жорий этилиши айтилганди.
Орадан бир йил вақт ўтган бўлса-да, юқорида айтилган икки ҳудудда ҳам давлат тиббий суғурта тизимига тўлиқ ўтилганича йўқ. Мазкур ҳолатни ўрганиш мақсадида “Дарё” мухбири масъуллар билан боғланди.
Давлат тиббий суғурта жамғармаси ахборот хизмати тақдим этган маълумотга кўра, давлат тиббий суғурта тизими Навоий вилоятида ҳали жорий этилмаган бўлиб, у ерда тайёргарлик ишлари олиб борилмоқда.
Жамғарманинг Тошкент шаҳар ҳудудий бўлинмаси бўлим бошлиғи Ўрал Сафаровнинг айтишича, давлат тиббий суғурта тизими пойтахтда 2024 йилнинг январь ойидан жорий этила бошлаган.
Тизимнинг кечикишига моддий техник базанинг етишмаслиги, рақамлаштириш ва ходимларнинг малакаси билан боғлиқ. Ҳозирда поликлиникалардаги 90 фоиздан ортиқ ходимлар тизим билан ишлашни ўзлаштирди.
Пойтахтда 2024 йилнинг охирига қадар тўлиқ суғурта тизимига ўтилади. Мамлакат бўйлаб 2026 йилга қадар ўтиш белгиланган. Агар тизим бутун ҳудудларда йўлга қўйилмаса, ишлаши қийин кечади. Сабаби фуқароларнинг кўчиши ва шунга ўхшаш омиллар тизимнинг ишлашига таъсир қилади.
Ҳозирда барча вилоятларда рақамлаштириш ишлари олиб борилмоқда. Бундан ташқари тиббиёт муассасаларнинг техник базаси тегишлилигига қараб Соғлиқни сақлаш вазирлиги ва ҳокимликлар билан ҳамкорликда тўлдириб борилмоқда, — деди Ўрал Сафаров.
Унинг қўшимча қилишича, келгусида нафақат давлат тиббиёт муассасалари балки, Давлат тиббий суғурта жамғармаси билан шартнома тузган нодавлат тиббиёт муассасаларига мурожаат қилиб, даволанган шахсларнинг суғурта пуллари қоплаб берилиши кўзда тутилган.
Изоҳ (0)