Қорақалпоғистон Республикаси ва Қашқадарё вилоятида қўлбола усулда алкоголь маҳсулотларини ишлаб чиқариш билан шуғулланиб келган шахслар ушланди, деб хабар беради Бош прокуратура ҳузуридаги департамент.
Қайд этилишича, департаментнинг Қорақалпоғистон Республикаси Тахиатош туман бўлими, ДХХ ва ИИВ ходимлари ҳамкорлигида тезкор тадбирлар ўтказилган. Тадбирлар давомида Нукус шаҳри “Жанабазар” МФЙ ҳудудидаги хонадонда яшовчи Р.Б. ўз уйида қўлбола усулда алкоголь маҳсулотлари ишлаб чиқариш билан шуғулланиб келиб, фуқаро З.Д.га жами 96 дона “Қаратау” номи остидаги акциз маркасиз алкоголь маҳсулотини 2,7 миллион сўмга сотган вақтида ашёвий далиллар билан ушланган.
Шунингдек, унинг кўрсатувига асосан Нукус шаҳри ва Тўрткўл туманида давом этган тадбирларда қалбаки алкоголь маҳсулотлари савдоси билан шуғулланиб келган Б.И. ва И.Қ. жами 1 110 дона “Қаратау” номли қўлбола алкоголь маҳсулотларини ўтказиш мақсадида олиб келган вақтида ашёвий далиллар билан ушланган.
Шу каби, департаментнинг Кўкдала туман бўлими томонидан ИИБ ходимлари билан ҳамкорликда ўтказилган тезкор тадбирда фуқаро Х.О. ҳеч қандай ҳужжатсиз 60 дона “Шаҳрисабз” номли алкоголь маҳсулотини фуқаро А.А.га сотган вақтида ушланиб, ундан жами 2 турдаги 336 дона истеъмолга яроқсиз ва қалбаки акциз маркали алкоголь маҳсулотлари ашёвий далил сифатида олинган.
Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Қорақалпоғистон Республикаси ва Фарғона вилоятида қалбаки акциз маркали алкоголь маҳсулотларини муомалага киритилишининг олди олингани тўғрисида хабар берилганди.
Изоҳ (0)