Сирдарё вилоятида ўзгалар номига онлайн кредит расмийлаштириб келган шахс қўлга олинди, деб хабар беради ИИВ Киберхавфсизлик маркази.
Қайд этилишича, Тошкент вилояти Бектемир туманида яшовчи 28 ёшли (аёл) Р.Т. ИИОга мурожаат қилиб, унинг номига номаълум шахс томонидан 30 миллион сўм миқдорида онлайн кредит расмийлаштирилганини маълум қилган.
Тезкор-қидирув хизмати Киберхавфсизлик бўлинмалари ходимлари томонидан ўтказилган тезкор-қидирув тадбирлари натижасида, мазкур жиноятни Сирдарё вилояти Сардоба туманида яшовчи 30 ёшли Н.Ф. содир этгани аниқланган.
Гумон қилинувчи сифатида тергов ҳаракатларига жалб этилган Н.Ф. (аёл) Р.Т.га Telegram орқали ҳавола жўнатиб, уни қизиқтириб, банк карта маълумотларини қўлга киритган ва унинг номига онлайн кредит расмийлаштирган. Сўнг пулларни бошқа банк карта ҳисоб рақамига ўтказиб олган.
Мазкур ҳолат юзасидан Жиноят кодексининг 169-моддаси (ўғрилик) 3-қисми “б” банди билан жиноят иши қўзғатилиб, Н.Ф.нинг содир этилиб фош этилмай қолган бошқа шу турдаги жиноятларга алоқадорлигини текшириш юзасидан тезкор-суриштирув ишлари олиб борилмоқда.
Бундан олдин Сурхондарё вилоятининг Олтинсой ва Термиз туманларида 11 миллиард сўмдан ортиқ кредит маблағларини ўзлаштирган МЧЖ раҳбарлари аниқланганди. Шунингдек, Сурхондарё ва Фарғонада оилавий корхоналар раҳбарлари 1,2 миллиард сўмдан ортиқ имтиёзли кредитларни талон-торож қилгани тўғрисида хабар берилган эди.
Изоҳ (0)