Telegram мессенжеридаги каналларда Ўзбекистонда фаолият юритувчи банкларга қарашли мавжуд банкоматлардан нақд пул ечишдаги комиссия пули 1 дан 1,5 фоизга ошгани хабар берилганди.
“Дарё” мухбири мазкур хабарга аниқлик киритиш мақсадида АТ “Халқ банки”, “Микрокредитбанк” АТБ, “Ўзсаноатқурилишбанк” АТБ, “Ўзмиллийбанк” АЖ, АТ “Бизнесни ривожлантириш банки” АТ “Алоқабанк” ахборот хизмати масъуллари билан боғланиб, ҳолатга аниқлик киритди.
Банк ахборот хизмати раҳбарларининг билдиришича, тармоқларда тарқалган хабар нотўғри. Айни кунда юқорида тилга олинган банкларга қарашли банкоматларда нақд пул ечиш билан боғлиқ хизматлар учун 1 фоиз устама олинади. Халқаро карталардан пул ечиш ҳам доимгидек 1,5 фоиз устама билан амалга оширилади.
“Ўзмиллийбанк” АЖ ахборот хизмати раҳбари Зебо Тўхтаеванинг “Дарё”га қўшимча қилишича, банк раҳбарияти айни кундаги мавжуд 1 фоизлик комиссия пулини пасайтириб, ярим фоизга тушириш ҳаракатини бошлаган. Тез орада мазкур банкларга қарашли банкоматлардан нақд пул ечиш билан боғлиқ харажатлар 0,5 фоиз эвазига амалга оширилади.
Эслатиб ўтамиз, айни кунда Ўзбекистонда фаолият юритувчи “Davrbank”, “Анорбанк”ларга қарашли банкоматларда банк мижозлари учун нақд пул ечиш хизмати 0,5 фоизни ташкил қилади.
Изоҳ (0)