Қозоғистон транспорт вазири Марат Карабаев жорий йилнинг баҳорида қор билан эрийдиган асфальт учун олдиндан узр сўради. Бу ҳақда Tengrinews хабар берди.
Мажлис арафасида транспорт вазиридан баҳорда қор билан бирга қозоқ йўлларининг неча километрида асфальт “эриши” сўралган. Марат Карабаев ҳозирда мутахассислар қўшимча ҳисоб-китоблар олиб бораётгани ва бундай ҳудудлар ҳақида олдиндан хабардор қилишларини айтган.
“Булар қайси участкалар эканини олдиндан маълум қиламиз. Бунинг учун албатта узр сўраймиз. Бу участкаларда 2024 йилда таъмирлаш ишларини олиб боришни режалаштирганмиз. Ҳақиқатан ҳам давлат томонидан замонавий йўллар қуриш учун катта маблағ ажратилмоқда. Аммо бу маблағнинг салмоқли қисми йирик транзит йўналишларига, яъни республика йўлларига ажратилади. Оқибатда пулнинг асосий қисми халқаро транзит йўналишларига кетади, бироқ ҳудудлар ичида таъмирлаш ишларини олиб бориш учун маблағ етишмаяпти”, — деди транспорт вазири.
Карабаевнинг қўшимча қилишича, жорий йилда вазирлик томонидан қайта ишлаш усулидан фойдаланган ҳолда ўрта ҳажмдаги йўлларни таъмирлаш бўйича янги дастур ишлаб чиқилмоқда.
“Бу йўл асосини қайта ишлаш ва унинг остига икки қават асфальт ётқизишни англатади. Бир километр йўлни реконструкция қилиш бир миллиард тенгега яқин туради. Янги усул билан бир километр тахминан 150 миллионга тушади. Пулни етти баробар тежаймиз”, — деб тушунтирди Карабаев.
Изоҳ (0)