Санкция остидаги шахсларга Ўзбекистон банкларида ҳисобварақ очиш тақиқланиши мумкинлиги тўғрисида хабар берилганди. Қонунчилик палатасининг Бюджет ва иқтисодий ислоҳотлар қўмитаси мазкур қонун лойиҳасининг мазмун-моҳияти нотўғри талқин қилинаётгани юзасидан расмий ахборот берди.
Қайд этилишича, бугунги кунда турли давлатлар, халқаро ташкилотлар ва молия институтлари томонидан иқтисодий санкциялар қўлланилиши халқаро иқтисодий муносабатларда ҳозирги замон воқелигига айланган. Бироқ Ўзбекистоннинг миллий қонунчилигида кредит ва тўлов ташкилотлари фаолиятида иккиламчи иқтисодий санкцияларнинг қўлланилиши билан боғлиқ хатарларни тартибга солиш ва назорат қилишнинг ҳуқуқий асослари мавжуд эмас.
Бундай шароитда ушбу хатарларни ҳар бир кредит ва тўлов ташкилоти ўзининг эҳтиёж ва қарашларидан келиб чиқиб белгиламоқда, ўзи маъқул кўрган даража ва кўламларда мижозларга чекловлар қўймоқда. Бундай ҳолатлар банк ҳисобварақлари очиш ва банк операцияларини амалга оширишда Ўзбекистон резидентлари ва норезидентларига нисбатан субъектив ёндашувларга ҳамда мижозларнинг қонуний ҳуқуқларининг бузилишига олиб келмоқда.
Шундан келиб чиқиб, қонун лойиҳасида кредит ташкилотлари, тўлов ташкилотлари ва тўлов тизимлари операторларининг иқтисодий санкциялар билан боғлиқ хатарларни бошқаришига оид ягона талабларни белгилаш ваколатини Марказий банкка бериш назарда тутилмоқда.
“Бу банк соҳасида давлат сиёсати самарадорлигини оширишга, кредит ва тўлов ташкилотларининг мижозлар билан ишлашда яхлит, ягона ёндашув механизмини яратишга, шунингдек, аҳоли ва халқаро молия институтларининг мамлакатимиз банк тизими фаолиятига ишончини мустаҳкамлашга хизмат қилади”, — дейилади хабарда.
Таъкидланишича, айрим оммавий ахборот воситалари ва ижтимоий тармоқларда мазкур қонун лойиҳасининг мазмун-моҳияти ва аҳамияти нотўғри ва ҳақиқатга мос келмайдиган тарзда талқин қилинмоқда.
“Шу ўринда, ушбу қонун лойиҳаси ҳеч қандай давлатга қарши қаратилган эмаслигини қайд этиш лозим. Дунёнинг деярли барча мамлакатларида лойиҳада кўзда тутилган тартиб мавжуд бўлиб, унинг мақсади миллий молия ташкилотларининг ўзларига нисбатан иккиламчи санкциялар қўлланилишига йўл қўймасликдир”, — дея ойдинлик киритади қўмита.
Эслатиб ўтамиз, февраль бошида Марказий банк бошқарувининг “Банклар ва нобанк кредит ташкилотларига нисбатан чоралар ва санкциялар қўллаш тартиби тўғрисидаги низомни тасдиқлаш ҳақида”ги қарори қабул қилинганди.
Изоҳ (0)