Ўзбекистоннинг Буюк Британиядаги элчихонасида Uzbekistan Business Consultants компанияси бошқарувчи директори Питер Маргейттс билан учрашув бўлиб ўтди. Бу ҳақда “Дунё” агентлиги хабар берди.
Қайд этилишича, мулоқот чоғида Ўзбекистон томони билан ҳамкорлик алоқаларини жадаллаштириш, қўшма лойиҳаларни амалга ошириш, мамлакатга хорижий сармояларни жалб этиш масалалари хусусида фикр алмашилган.
Питер Маргейттс Британия компаниялари Ўзбекистонда графит конларини излаб топиш, ушбу жабҳада янги лойиҳаларни амалга оширишга қизиқиш билдираётганини маълум қилган. Унинг айтишича, 2 февраль куни Қашқадарё вилоятига қилган ишчи сафари жуда самарали кечган.
Сафар давомида Қашқадарё вилояти ҳокимлиги вакиллари билан музокаралар ўтказдик. Шунингдек, Ўзбекистондаги конларда давлат хусусий шериклик асосида ҳаётга татбиқ этиладиган сармоявий лойиҳалар тақдимоти билан танишдим, — дейди у.
Учрашув якунида мазкур соҳада инвестициявий лойиҳаларни амалга ошириш бўйича мулоқотларни давом эттириш тўғрисида келишиб олинган.
Uzbekistan Business Consultants компанияси Британияда рўйхатга олинган. Компания Ўзбекистон ва МДҲ давлатларида савдо, инвестиция соҳаларида консалтинг хизматларни кўрсатишга ихтисослашган.
Аввалроқ геология соҳасига йилига 1 триллион сўмдан маблағ ажратилгани маълум бўлганди.
Изоҳ (0)