Қозоғистоннинг Олмаота шаҳрида номаълум шахс сабзавот дўконларидан бирида одамларга қарата ўт очди. Бу ҳақда “Kazinform” хабар берди.
Воқеа акс этган кадрлар 12 февралдан ижтимоий тармоқларда тарқалган. Унда дўконда бир неча эркак ўзаро гаплашиб турганида, номаълум эркак кириб, ўт очганини кўриш мумкин. Отишма оқибатида бир киши жароҳатланган.
Полицияга кўра, воқеа 2023 йил 30 декабрь куни Шолпан шаҳар турар жой мажмуаси яқинида содир бўлган. Шаҳар ички ишлар бошқармаси ушбу воқеа юзасидан жиноий иш очилгани ҳақида маълумот берди.
“Безорилик асосида қўзғатилган жиноят иши дастлабки тергов маълумотлари инобатга олиниб, эртаси куни қотилликка суиқасд тоифасига ўзгартирилди. Гумонланувчи ушланиб, қамоққа олинган. Ашёвий далиллар мусодара қилинди. Тегишли экспертиза тайинланган”, — дея изоҳ берди шаҳар ИИБ матбуот хизмати.
Тергов ишларининг бориши ИИБ раҳбарияти назоратида экани маълум қилинди.
Изоҳ (0)