Орбан Украинадаги урушни тўхтатишга қодир ягона шахс кимлигини айтди

Венгрия бош вазири Виктор Орбан АҚШ собиқ президенти Дональд Трамп “урушни тўхтата оладиган ягона етакчи” эканини айтди.

“Дональд Трамп 2022 йил февралида АҚШ президенти бўлганида эди, Европада уруш бўлмасди. Мен бугун Европада ҳам, Америкада ҳам урушни тўхтата оладиган даражада кучли етакчи бўла оладиган бошқа ҳеч кимни кўрмаяпман. Тинчликнинг исми бор — Дональд Трамп”, — деди Орбан Франциянинг Le Point журналига берган интервьюсида.

Венгрия бош вазири, шунингдек, Будапешт Европа Иттифоқининг Киевга 50 миллиард евро миқдорида молиявий ёрдам ажратишига қўйган ветосини бекор қилиш шартини ҳам айтди.

“Муросали таклиф беришга қарор қилдик: биз бюджетни ўзгартиришга рози эмасмиз. 50 миллиард евро ажратишга рози эмасмиз, бу жуда катта миқдор. Бу суммани тўрт йилга бериш керак деган фикрга қўшилмаймиз. Аммо Венгрия Европа Иттифоқининг 26 мамлакати ташаббусига қўшилишга тайёр, агар бу пулни жўнатишни давом эттириш ёки тўхтатиш ҳақидаги қарорларни ҳар йили янгилашга кафолатлар бўлса. Йиллик қарор эса бугунгидек қонуний асосга эга бўлиши керак: у бир овоздан қабул қилиниши керак”, — деди у.

Венгрия бош вазири, шунингдек, айрим давлатлар Будапешт позициясини шантаж усули сифатида талқин қилаётганидан афсусда эканини билдирди.

У яна бир бор Венгрия Украинадаги можарони ҳарбий йўл билан ҳал қилишнинг иложи йўқ деган позицияга амал қилишини, бироқ Европа Иттифоқига аъзо қолган 26 давлат бошқача фикрда эканини такрорлади.

“Уларнинг таклифи ҳарбий ечимга қаратилган, мен бунга рози эмасман. Венгерлар ҳам буни қўллаб-қувватламайди. Биз ягона ечим дипломатик йўл деб ҳисоблаймиз. Бу ўт очишни тўхтатиш ва тинчлик бўйича музокараларни ўз ичига олади”, — деди Орбан.

Бош вазирнинг тушунтиришича, шу контекстда Киевга кейинги тўрт йил учун 50 миллиард евро ажратиш можарони кучайтиради.