Исроил ва ҲАМАС яқин икки ҳафта ичида янги келишувга эришиши мумкин. Бу гаровга олинганларни озод қилиш эвазига ҳарбий ҳаракатларни 2 ойга тўхтатишни назарда тутади. Бу ҳақда Тhе New York Times хабар берди.
Хабарга кўра, Исроил ва ҲАМАС келишувга эришишга яқин турибди. Музокарачилар Исроил ва ҲАМАС таклифларини бирлаштирган ҳолда ёзма келишув лойиҳасини ишлаб чиқди. У 28 январь куни Парижда бўлиб ўтадиган музокаралар мавзусига айланади. АҚШ президенти Жо Байден 26 январь куни ҲАМАС билан музокараларда воситачилик қилаётган Миср ва Қатар етакчилари билан қолган келишмовчиликларни бартараф этиш учун телефон орқали гаплашган.
“Марказий разведка бошқармаси директори Уилям Бернс ҳам Исроил, Миср ва Қатар расмийлари билан музокараларда иштирок этиш учун Парижга йўл олади”, — деб ёзади NYT.
Ноябрь ойида АҚШ, Қатар ва Миср воситачилигида қисқа муддатли сулҳ тузилди: Исроил бир ҳафта давомида ҳарбий ҳаракатларни тўхтатди ва Исроил қамоқхоналарида сақланаётган тахминан 240 нафар фаластинлик эвазига юздан ортиқ гаровга олинганлар озод қилинди. ҲАМАС гаровида 100 дан ортиқ исроиллик қолмоқда.
Янги келишув аввалгисидан каттароқ бўлади, деб ёзади NYT манбаларга таяниб.
Биринчи босқичда жанглар тахминан 30 кунга тўхтайди, ҲАМАС аёллар, қариялар ва ярадорларни гаровдан озод қилади. Бу давр мобайнида ҳар икки томон ҳам жанговар ҳаракатларни яна бир ойга тўхтатадиган иккинчи босқич тафсилотларини ишлаб чиқади.
“Бу босқичда қолган Исроил аскарлари ва гаровга олинган эркакларни алмашиш режалаштирилган. Бунинг эвазига Исроил ўз қамоқхоналаридан маълум миқдордаги фаластинликларни ҳам озод қилади; аниқ миқдори бўйича келишиб олиш керак”, — дейилади мақолада.
Шунингдек, келишув Ғазога кўпроқ инсонпарварлик ёрдамини олиб кириш имконини бериши мумкин. Келишув ҲАМАС илгари сураётган тўлиқ оташкесимни ўз ичига олмаса-да, музокараларга яқин бўлган расмийлар агар Исроил урушни икки ойга тўхтаца, уни ҳозиргидай шиддатли даражада қайта тикламаслиги мумкинлигини айтмоқда.
Бундан ташқари, мазкур сулҳ Яқин Шарқдаги кенг кўламли можарони ҳал қилишга олиб келадиган кейинги дипломатик жараёнларга йўл очиши кутилмоқда.
Изоҳ (0)